Со авион Ц-27 на грчкото воено воздухопловство, доцна вечерва од Скопје во Атина ќе бидат префрлени уште четворица повредени во пожарот во Кочани, јави МИА.

Според информациите, станува збор за четири лица со изгореници кои ќе бидат хоспитализирани во воена болница во Атина.

Воениот авион од Атина полета за Скопје околу 22:30 часот по локално време, а откако ќе ги преземе повредените, веднаш ќе се врати на воениот аеродром во грчката престолнина.

На ист начин синоќа беа пренесени тројца повредени, на возраст од 22 до 24 години, кои се згрижени во Општата воената болница 401 и се во релативно добра состојба.

Со четворицата кои во Атина ќе пристигнат во текот на ноќта, вкупниот број на пациенти повредени во пожарот во Кочани кои се лекуваат во Грција ќе изнесува 12 – петмина во Солун (тројца во болницата Папаниколау, двајца во воената болница 424) и седуммина во воени болници во Атина.

Слободен Печат

Министерството за здравство информира дека медицинските тимови во здравствените установи во земјава и странство остануваат целосно ангажирани во обезбедување соодветна нега за сите пациенти.

Во болниците низ земјата моментално се хоспитализирани вкупно 75 пациенти, распределени по различни клиники, додека во странство продолжува лекувањето на 67 пациенти.

Според податоците, во Австрија од шестмина пациенти, пет се на интензивно лекување, а еден е префрлен на интерно одделение. Во Литванија четири пациенти се во стабилна состојба на интензивна нега. Петтемина повредени во пожарот во Кочани, кои се лекуваат во Анкара, сега дишат самостојно.

Во Србија се лекуваат 30 пациенти, во Бугарија 14, од кои седум се на интензивна нега, а во Грција осум пациенти покажуваат подобрување.

Министерството за здравство најави дека во текот на ноќта се очекува нови пациенти да бидат упатени во европски медицински центри, изразувајќи благодарност за поддршката од меѓународните партнери.

Во досегашниот тек од истражните дејствија во однос на пожарот во дискотеката „Пулс“ во Кочани досега се приведени 18 а задржани се 16 лица. Вкупно се извршени разговори со 71 лице, од кои 42 во Скопје и 29 лица во Кочани. За 14 лица е изречена мерка притвор во траење од 48 часа, информираше во вторникот министерот за внатрешни работи Панче Тошковски.

На 11 лица им е одредена мерка притвор за постоење основано сомнение за сторени „тешки дела против општата сигурност“, додека на три лица име одреден притвор за „несовено работење“.

Тошковски, на прес-конференција во Министерството денеска информираше дека последното задржано лице се товари за „тешки дела против општата сигурност“ во врска со предизвикување на општа опасност, а истото е потписник на еден од потребните документи за ставање во функција на еден кабаре клуб.

„Постојат основи, коишто одат во насока дека незаконито, паушално, без утврдување на фактичка состојба биле изготвувани круцијални документи, коишто биле предуслов во понатамошната постапка за ставање во функција за предметното кабаре“, рече Тошковски.

Извршени се, нагласи министерот, претреси кај две лица, вработени во Министерство за економија, при што одземени се техничка опрема, документација, оружје, муниција…

Претреси извршени се и кај управителот и одговорното лице на дискотеката, а денеска полициски службеници од Одделот за крим полиција и организиран криминал влегоа и во општината, каде како што нагласи Тошковски, се преземаат мерки и активности за обезбедување на документација поврзана со дискотеката.