Рудникот „Тораница“ ќе се соочи со максимална прекршочна глоба од 180.000 до 200.000 евра поради утврдени прекршувања на еколошките стандарди. Ова го потврди првиот вицепремиер и министер за животна средина и просторно планирање, Изет Меџити, кој нагласи дека Министерството ќе продолжи со засилен инспекциски надзор и ќе инсистира на целосна транспарентност и одговорност.

„Законот мора да се почитува. Секој што ќе ја загрози животната средина ќе се соочи со санкции, без исклучок. Инспекциските контроли ќе продолжат со засилено темпо, а Министерството ќе инсистира на целосна транспарентност и одговорност. Ова е само еден од многуте чекори што ги преземаме за да обезбедиме чиста и безбедна околина за сите граѓани“, изјави Меџити.

Оваа казна доаѓа во време на зголемени напори од страна на Владата за заштита на животната средина, а Министерството за животна средина веќе најави нови мерки за построги контроли и санкции за сите субјекти што не ги почитуваат прописите. Според надлежните, инспекциите во рудниците ќе бидат значително засилени, а ќе се работи и на подобрување на законската рамка за поголема заштита на природата и граѓаните.

Рудникот „Тораница“ доби налог за итно усогласување со еколошките стандарди, а доколку не ги исполни потребните мерки, се најавуваат дополнителни санкции. Министерството останува доследно во својата политика за зачувување на животната средина и одржлив развој.

По целосно спроведена истражна постапка, Основното јавно обвинителство Скопје поднесе обвинителен акт против едно лице за кривичното дело „Тешки дела против безбедноста на луѓето и имотот во сообраќајот“ од член 300 став 2 во врска со член 297 став 1 од Кривичниот законик.

Во рок од два месеци по трагичниот настан, јавниот обвинител ги прибра сите релевантни докази и вештачења, кои укажуваат дека обвинетиот го сторил ова тешко кривично дело, за кое е предвидена максимална казна затвор до 20 години.

Според обвинението, на 29 јануари, 15 минути пред полноќ, обвинетиот, кој воопшто не поседувал возачка дозвола, управувал патничко возило „Пежо 207“, сопственост на неговиот татко.

Тој не се придржувал кон сообраќајните прописи, свесно го довел во опасност животот на луѓето, управувајќи го автомобилот под дејство на алкохол со 0.80 промили алкохол во крвта и со брзина од 91 km/h – речиси двојно повеќе од дозволената.

Кога пристигнал пред обележаниот пешачки премин на крстосницата меѓу булеварот „Партизански одреди“ и улицата „29-ти Ноември“, тој не запрел на црвено светло, туку продолжил со движење. Со предниот лев дел од возилото удрил во телото на пешакот Фросина Кулакова, која во тој момент минувала на зелено светло за пешаци.

Силниот удар ја издигнал оштетената во воздух, по што таа удрила во семафор поставен на разделното пешачко стојалиште. Од здобиените тешки повреди, Кулакова починала на самото место.

Обвинителството истакнува дека постојат околности што оправдуваат страв од бегство на обвинетиот, како и можноста за повторување на кривичното дело. Имајќи ја предвид сериозноста на случајот, возраста на обвинетиот и останатите факти, јавниот обвинител побара од судот да ја продолжи мерката притвор.

Борче Јованчевски успеал да се спаси од трагичниот пожар во дискотеката во Кочани, но се вратил со цел да помогне во извлекувањето на заглавените млади луѓе во моментот кога настанало стампедото по пожарот во дискотеката.

Борче за платформата supportkocani.com раскажа што се случувало кобната ноќ во дискотеката во Кочани.

“Пејачите рекоа ‘сите надвор, сите надвор, ќе се вратиме’. Тргнавме полека да излегуваме надвор, но наеднаш настана стампедо и хаос”, раскажа Јованчевски.

Борче изјави дека веднаш до него бил Лазе, член на обезбедувањето. Според изјавата на Борче, членот на обезбедување Лазе бил многу силен и можел да извлече повеќе луѓе, па ги подавале сите нанадвор. Пристигнал и неговиот дедо, со кој заедно почнале да ги вадат луѓето од дискотеката.

“Имаше запалено од едната страна бела даска која гореше, заедно ја кренавме и ја фрливме и дедо ми започна на левата страна да влече луѓе, а јас видов рака и некој ми го извика името. Тоа беше мојата сопруга. За среќа беше жива”, раскажа Борче.

Погледнете го видеото во продолжение:

Во пожарот во “Пулс” загинаа 59 лица, а околу 200 беа повредени. Во пожарот загина и возачот на Брзата помош, Иле Гоцевски, кој цела вечер и утредента пренесувал повредени лица од Кочани до Скопје. Кога пристигнал дома, Иле заспал и повеќе не се разбудил.