Министерот за здравство Арбен Таравари вечерва рече дека засега останува да биде министер за здравство, иако дел од медиумите објавија информации дека ќе ја напушти коалицијата „Влен“. 

– Засега, да. Во „Влен“ се подготвуваме за локалните избори. Нормално, внатре во коалицијата сме во процедура на договарање и во Владата мислам дека стабилна е состојбата така што продолжувам да бидам министер за здравство и се надевам дека ќе изнајдеме најдобро можно решение сите страни да бидат задоволни, изјави Таравари во вечерашното гостување во централниот дневник на телевизија „Сител“. 

Доцна попладнево во Скопје се врати и вториот од пациентите кои беа испратени на лекување во странство, од повредените во пожарот во кочанската дискотека „Пулс“, објави Телма.

Министерот за здравство Арбен Таравари рече дека станува збор за 22 годишно момче, кое било лекувано на Клиниката за Пластична хирургија од која и било испратено на лекување во Атина.

Таравари напомена дека според протоколите тоа повторно ќе биде примено на Пластична хирургија и изрази надеж дека по 24 часовниот мониторинг ќе биде пуштено на домашно лекување.

Основниот суд во Кочани постапувајќи по жалбите поднесени од 17 осомничени, ги одби жалбите на 14 лица и ја потврди мерката притвор. За три лица, мерката ефективен притвор беше заменета со куќен притвор, како што информираа од Обвинителството во врска со притворите на осомничените за пожарот во дискотеката Пулс, каде што загинаа 59 лица.

Што се однесува до двајца поранешни градоначалници на Кочани, Обвинителството за Кочани вложи жалба пред Апелацискиот суд во Штип, барајќи да остане на сила мерката ефективен притвор.