Фудбалската федерација на Македонија донесе солидарна одлука – сите средства од продажбата на билетите за квалификацискиот натпревар против Велс ќе бидат донирани.

Оваа иницијатива доаѓа како знак на почит кон жртвите од трагедијата во ноќниот клуб во Кочани, каде што животот го загубија 59 лица. Очекувањата се дека на трибините на Арената „Тодор Проески“ ќе има околу 20.000 навивачи.

Претседателот на ФФМ, Масар Омерагиќ, лично купи 300 билети со цел да ги донира, а спортскиот директор Горан Пандев набави уште 100.

Дополнително, ФФМ испрати покана до сите основни училишта во Македонија, овозможувајќи им на учениците бесплатно да го следат натпреварот и да бидат дел од оваа акција.

Најдобриот македонски автомобилист, Игор Стефаноски-Иџе, во следните трки низ Европа ќе настапува со црна боја на својот автомобил како израз на почит за жртвите во трагедијата во Кочани.

Трагедијата која ја потресе целата земја предизвика голема болка, а многумина на свој начин оддаваат почит на настраданите.

Задниот дел на автомобилот на Иџе ќе биде обоен во црна боја како симбол на почит.

„Црна боја на моето возило со кое ќе настапувам на трките низ Европа како знак на почит кон оние што ги загубија животите во оваа страшна несреќа. Ова не е само боја – ова е порака на сочувство, солидарност и поддршка за нивните семејства и најблиски. Некои победи се на патеката, но вистинските победи се кога сме заедно во тешките моменти“, објави Иџе.

Раководството на Шкупи донесе одлука трајно да го повлече дресот со број 77 од употреба во чест на Андреј Лазаров, фудбалерот кој го загуби животот во страшната трагедија во Кочани. Воедно, Шкупи на семејството на Лазаров ќе му ги исплати сите плати од договорот што го имаше фудбалерот со екипата од скопски Чаир.

„Го повлекуваме бројот 77, договорот на Лазаров ќе му биде исплатен на неговото семејство до истекот. ФК Шкупи донесе одлука да го повлече од употреба бројот 77, кој го носеше Андреј Лазаров сè до неговото прерано заминување од овој свет. Ова е еден мал гест од наша страна во знак на почит и благодарност за неговиот придонес во клубот. Исто така, клубот одлучи неговото семејство да ги добива платите според договорот што Лазаров го имаше со ФК Шкупи. Андреј Лазаров засекогаш ќе остане дел од историјата на ФК Шкупи, а овие одлуки донесени од раководството се мал знак на почит за оддавање чест на неговото сеќавање“, се вели во клупското соопштение на Шкупи.