Шкупи во чест на Лазаров: Повлечен неговиот број, семејството ќе ги добие сите плати од договорот

Раководството на Шкупи донесе одлука трајно да го повлече дресот со број 77 од употреба во чест на Андреј Лазаров, фудбалерот кој го загуби животот во страшната трагедија во Кочани. Воедно, Шкупи на семејството на Лазаров ќе му ги исплати сите плати од договорот што го имаше фудбалерот со екипата од скопски Чаир.

„Го повлекуваме бројот 77, договорот на Лазаров ќе му биде исплатен на неговото семејство до истекот. ФК Шкупи донесе одлука да го повлече од употреба бројот 77, кој го носеше Андреј Лазаров сè до неговото прерано заминување од овој свет. Ова е еден мал гест од наша страна во знак на почит и благодарност за неговиот придонес во клубот. Исто така, клубот одлучи неговото семејство да ги добива платите според договорот што Лазаров го имаше со ФК Шкупи. Андреј Лазаров засекогаш ќе остане дел од историјата на ФК Шкупи, а овие одлуки донесени од раководството се мал знак на почит за оддавање чест на неговото сеќавање“, се вели во клупското соопштение на Шкупи.