Во кинескиот град Жужоу (провинција Хунан), каде што просечните станари плаќаат кирија од 100 до 225 евра месечно, една 18-годишна работничка нашла необично решение за станбената криза: живее во тоалетот на своето работно место.

Според извештајот на South China Morning Post, младата девојка која работи во салон за мебел, договорила со својот работодавец да преноќува во службениот тоалет, плаќајќи само 6,27 евра месечно (385 денари).

Во простор од само 6 м², каде што се наоѓаат два WC-а и лавабо, поставила расклопен кревет, завеса и закачалка. И покрај непријатните услови, нагласува дека просторот го одржува чист и дека нема проблеми со миризбата.

„Ништо никогаш не ми украле, па не ги заклучувам вратите“, изјавила таа.

Понекогаш дури и готви тестенини на мал електричен шпорет.

Нејзината приказна предизвикала различни реакции на кинеските социјални мрежи. Додека многумина ја фалеа за упорноста, други коментираа со иронија:

„Овој тоалет е голем како мојот стан во Хонг Конг!“

Девојката ја напуштила својата куќа на 16 години за да работи и да помага на своето семејство. Поголемиот дел од својата скромна плата ја праќа на својот брат за школување, а остатокот го штеди за куќа и автомобил. Сепак, наскоро ќе има подобрување – до крајот на месецот ќе се пресели во реновиран простор во канцеларијата на салонот за мебел.

За денеска се планирани околу 1200 протести низ САД и други делови од светот, а организаторите очекуваат да биде најголемиот протест против претседателот Доналд Трамп и неговиот советник Илон Маск, кои ја насочија новата администрација кон конзервативна политика, јавуваат американски медиуми.

Протестот наречен „Hands Off“ ќе им овозможи на противниците на владата да го изразат своето незадоволство од промените во внатрешната и надворешната политика на САД, изјави Езра Левин, еден од основачите на групата Indivisible, која е еден од организаторите.

Протести се планирани во сите 50 американски држави, како и во Канада, Велика Британија, Германија, Португалија и Мексико. Најголемиот протест се очекува во Вашингтон. Во протестите ќе учествуваат околу 150 активистички групи, вклучително синдикатот SEIU со два милиони членови и групи како Кампањата за човекови права и Гринпис.

Трамп се врати на власт на 20 јануари, а критичарите тврдат дека ја преобликувал владата и ја консолидирал претседателската власт преку Проектот 2025, конзервативна политичка иницијатива. Поддржувачите на Трамп ја поздравуваат неговата смелост да ги наруши интересите на либералната страна.

Лиз Хјустон од Белата куќа ги негираше тврдењата дека Трамп ќе ги намали услугите на Медикеид и социјалното осигурување, нагласувајќи дека неговата позиција е јасна – ќе ги заштити тие услуги за сите што имаат право на нив.

Трамп е критикуван и за отпуштање на државни службеници, депортирање на илегални имигранти и странски студенти кои учествувале во насилните пропалестински собири, како и за одземање на правата на трансродовите лица кои ги добиле за време на претходниот претседател Бајден.

Групата Indivisible е формирана по победата на Трамп во 2016 и тесно соработува со други здруженија како MoveOn и Working Families Party.

Францускиот претседател Емануел Макрон ќе стане претставник на Европа во преговорите со руското раководство за склучување мир во Украина, објави „Дејли телеграф“, повикувајќи се на извор во Елисејската палата.

Според изворот, се вели дека францускиот лидер е подготвен да ја преземе лидерската улога „кога е вистинското време“. Сепак, изворот нагласи дека досега не е дојдено вистинското време.

Како што забележува изданието, „коалицијата на подготвените“ (група земји подготвени да ги финансираат и да учествуваат во мировните напори во Украина во случај на договор за прекин на огнот) го турна Макрон на таков чекор, посочувајќи дека претходно одржувал близок контакт со рускиот претседател Владимир Путин. Во меѓувреме, според изданието, британскиот премиер Кир Стармер не планира да преговара со Москва.

Претходно „коалицијата на подготвените“ дојде до заклучок дека барем еден европски лидер треба да влезе во директен дијалог со Путин на тема Украина.

Оваа недела, Александар Стуб, финскиот претседател, рече дека Британија и Франција треба да го преземат водството на какви било разговори со Путин, пишува весникот.

„Моја лична желба би била тоа да го прават нашите претставници на „коалицијата на подготвените“. Со други зборови, Франција или Обединетото Кралство“, рече Стуб, цитиран од изданието.

Според прес-секретарот на рускиот претседател Дмитриј Песков, Кремљ сѐ уште не добил сигнали од Европа за подготвеноста за дијалог и желбата да организира преговори со рускиот лидер.

Во март, Макрон им рече на новинарите дека ќе биде подготвен да го продолжи дијалогот со Путин кога и Европа и Украина ќе одлучат дека е дојдено време.