Украинскиот претседател, Володимир Зеленски, изјави дека неговата земја интензивно го зголемува производството на беспилотни летала и роботски системи, оценувајќи дека развојот на домашната воена индустрија е клучен за одржување на борбените капацитети на фронтот.

– Најважна тема на денешната седница на Генералштабот беа извештаите за домашното производство на дронови. Максимално ги зголемуваме капацитетите – од тактички модели како „Мавик“ до дронови со голем домет. Паралелно, го јакнеме и нашето производство на копнени роботски системи – изјави Зеленски во вечерното обраќање, пренесува украинската агенција Интерфакс.

Нови дронови, домашна продукција, стабилно снабдување

Според неговите зборови, Украина мора да обезбеди постојан раст во производството и испораката на сите потребни компоненти за беспилотни системи, а тековната динамика дава причина за оптимизам.

– Особено работиме на развојот на оптички беспилотни летала. Само од почетокот на годината, повеќе од 20 нови модели со оптички системи за управување се сертифицирани. Веќе 11 домашни компании ја совладаа нивната продукција. Нашиот цел е да го зголемиме обемот и брзината на испораките – нагласи Зеленски.

Тој додаде дека украинските одбранбени сили ќе бидат опремени согласно со потребите во текот на оваа година.

– Напредокот го бележиме и во секторот „DeepStrike“ – дронови со голем домет. Не можам да наведам точни бројки, но ви гарантирам дека ќе обезбедиме доволни количини за војската – додаде претседателот.

Цел: Заштита на територијата и уништување на руската логистика

Зеленски исто така информираше дека го сослушал извештајот на главниот командант на украинската војска, генералот Олександер Сирски, за состојбата на фронтот и активностите на украинските сили во руските погранични области Курск и Белгород.

– Продолжуваме со операциите во пограничните региони, и тоа е сосема оправдано. Војната мора да се врати таму од каде што почна. Нашата главна цел останува иста – да ја заштитиме нашата земја – изјави Зеленски.

Според неговите зборови, операцијата во Курската област помогнала во олеснувањето на другите делови на фронтот, особено Донецката област.

– Исклучително важно е да продолжиме со уништувањето на руската техника и целокупната логистика која ја користи окупаторот – заклучи украинскиот лидер.

Украина започна со распоредување на до 15.000 вооружени борбени роботи, познати како „тивки убијци“, објави британскиот „Дејли Мирор“, повикувајќи се на извори од Украина.

Овие роботи војници се дизајнирани за поддршка на трупите во рововите и како помош во градските борби, а, како што се надеваат украинските воени команданти, тие би можеле да претставуваат клучен пресврт во борбите кои се сѐ повеќе водат од ровови и на кратки дистанци, и да претставуваат напредок во високотехнолошкото војување, пишува весникот.

Роботите се опремени со оружје и сензори, можат да се движат по нерамен терен и да функционираат и преку ден и преку ноќ. Еден од најистакнатите модели е „Лутиот“, вооружен со пушка кал. 7,62 мм (истиот кал. користи и АК47), а се користи за извидување, поддршка на напади и прецизно огнено дејствување.

Украинските сили им доделиле специјална улога на овие мобилни оружја во воената тактика – за напади од неочекувани правци и за отвлекување на вниманието на руските трупи, наведува британскиот весник.

Роботите се контролираат на далечина, што овозможува на операторите да бидат безбедни, додека драстично го намалуваат ризикот за луѓето, што е особено важно поради големите украински загуби, се вели во текстот.

Министерството за одбрана на Украина инвестирало дури 120 милиони фунти (повеќе од 140 милиони евра) во роботизирани воени системи само во првиот квартал на 2025 година.

Ова е најголема инвестиција во воената автоматизација досега, а Киев верува дека масовната употреба на роботи ќе ја промени моменталната ситуација на фронтот во нивна корист.

Американскиот претседател Доналд Трамп ја одби понудата од претседателката на Европската комисија, Урсула фон дер Лајен, за договор во врска со царините.

Трамп изјави дека за да добие одложување на царините, Европската Унија треба да се согласи да купи американска енергија во вредност од 350 милијарди долари, отфрлајќи ја понудата на Брисел за „нула за нула“ царини на возила и индустриски производи.

Ова следува по понудата на Урсула фон дер Лајен, која предложи укинување на царините за автомобили и индустриски добра увезени од САД, под услов Трамп да возврати со истата мерка. На прашањето дали оваа понуда е доволна, Трамп одговори: „Не, не е“.

„Имаме дефицит со Европската Унија од 350 милијарди долари и тој брзо ќе исчезне“, изјави Трамп, додавајќи дека еден од начините да се промени тоа е ЕУ да купува енергија од САД. „Можеме да собереме 350 милијарди долари за една недела. Мораат да купат и да се обврзат дека ќе купат слична количина енергија“, истакна тој.

Оваа понуда на Фон дер Лајен дојде откако Трамп минатата недела воведе царини од 20 проценти за Европската Унија и минимален данок од 10 проценти за други трговски партнери. Како резултат на овие мерки, финансиските пазари глобално изгубија милијарди долари, а европските акции доживеаја најголем пад од почетокот на пандемијата на Ковид-19, пренесува Политико.

Трамп нагласи дека царините можат да бидат постојани или предмет на преговори, но под услов: „Ако можеме да направиме навистина фер и добар договор за САД, а не добар за другите. Сега Америка е на прво место“, рече тој. Своето објаснување го дополни со следните зборови: „Нашата земја беше најсилна од 1870 до 1913 година. Знаете ли зошто? Се беше засновано на царини. Немавме данок на приход. Тогаш, во 1913 година, некој генијалец дојде на идеја да им наплати на луѓето во нашата земја, а не на странските земји кои крадат од нашата земја“, пренесува Н1.