Основното јавно обвинителство во Куманово донесе Наредба за спроведување истражна постапка против двајца браќа од кривопаланечкото село Луке, кои се осомничени дека како соизвршители го извршиле кривичното дело – убиство, согласно член 123 став 2 точка 4 од Кривичниот законик.

Осомничените, на возраст од 20 и 25 години, од користољубие го лишиле од живот нивниот соселанец. Во ноќта меѓу 24 и 25 март, тие се договориле да извршат кражба во домот на жртвата. Помладиот брат го разбудил оштетениот и го извел надвор, објаснувајќи му дека сака да купи ракија. По тоа, го удрил со мотика по главата и заедно го влечеле, при што му нанеле уште неколку удари со предмет. По пребарувањето на џебовите од жртвата, одзеле 6.000 денари кои ги поделиле, а потоа ја пребарале куќата и помошните простории. На крај, телото го полеале со бензин и нафта, го запалиле и го фрлиле во дупка покрај реката, покривајќи го со дрвја и камења.

По предлог на јавниот обвинител, Основниот суд во Куманово донесе одлука за притвор на двајцата осомничени, кои до целосното расчистување на случајот ќе бидат задржани во краткотраен притвор од 48 часа.

Малолетничка загинала во сообраќајка која се случила на 6. април.

Таа во несреќата, која се случила на локалниот пат од скопското село Патишка река до селото Осинчани, се здобила со тешки телесни повреди, била пренесена во Градската општа болница „Св.Наум Охридски“, каде починала.

Сообраќајката, како што информираа од полицијата се случила помеѓу возило „фолксваген голф“ со скопски регистарски ознаки, управувано од У.О. (19) од скоското село Студеничани и возило „мерцедес“ со скопски регистарски ознаки, управувано од Ф.А. (29) од Скопје.

Малолетничката била во возилото „мерцедес“, а повредени се и возачот, сопатничката Р.А.(24) и уште една малолетна сопатничка – двете од Скопје.

Повреден е и возачот на „фолксваген голф“, кој бил приведен.

Телото на малолетничката е дадено на обдукција.

СВР Штип до ОЈО Кочани поднесе кривична пријава против 37-годишниот Г.А., 23-годишниот Б.Ч. и 60-годишната Р.Ѓ., тројцата од Струмица, поради основи на сомнение за сторено кривично дело „грабнување” од чл.144 ст.1 од КЗ.

На 06.04.2025 во 14.40 часот во беровско село, полициски службеници од ОВР Берово ги лишиле од слобода Г.А.(37), Б.Ч.(23) и 60-годишната Р.Ѓ., тројцата од Струмица, постапувајќи по претходна пријава дека од семејниот дом на Д.В.(59) од Делчево со употреба на сила ја земале 32-годишната вонбрачна сопруга на неговиот син и со патничко возило „ауди“ со струмички регистарски ознаки заминале од местото.

На 07.04.2025 лицата се изведени пред судија на претходна постапка во судот во Кочани, при што на Р.Ѓ. и е одреден домашен притвор, а на Г.А. и Б.Ч. притвор во траење од 30 дена.