Тетовскиот регион утре ќе се соочи со повеќе прекини во снабдувањето со електрична енергија поради планирани и непланирани интервенции на мрежата, соопштуваат од електродистрибуцијата.

Поради непланиран прекин, без струја ќе останат населените места Доброште, Одри, Првце, Вратница и Беловиште. Времетраењето на овој прекин не е наведено.

Дополнително, во селото Јажинце, од 08:30 до 14:00 часот, ќе има планиран прекин на струја во делот на селото кај објектите што се наоѓаат на излезот кон граничниот премин.

Во исто време, од 09:00 до 14:00 часот, дел од селото Палатица ќе биде без електрична енергија.

Во самиот град Тетово, од 12:00 до 13:00 часот, струја ќе нема во објектот на Даути Комерц на улица Илинденска.

Граѓаните се повикуваат да ги прилагодат своите дневни активности според најавените прекини.

Денес, во 08:00 часот, започна електронското аплицирање на јавниот повик на Општина Битола за субвенционирање на замена на старата, дотраена и енергетско неефикасна дограма (дрвена) со нова ПВЦ или алуминиумска дограма за домаќинствата на територија на Општина Битола.
Електронското аплицирање започна успешно, а првата апликација беше поднесена во 8 часот и 22 секунди.

До 10 часот и 43 минути, аплицирале вкупно 151 граѓанин или вкупно 168 поднесени барања, вклучувајќи ги повторните обиди на некои граѓани кои го поништиле првото барање и го искористиле правото за максимален број од 3 обиди за оние кои имале потреба од корекција на својата апликација.
Зад секоја од овие бројки стои име, презиме и информации за секој од нашите граѓани кои аплицирале, запишани и обезбедени во база на податоци, што повторно дава потврда за она што беше цел на општината, односно отстранување на најмал сомнеж за можна манипулација и влијание на човечки фактор.

Секој граѓанин кој аплицирал на својата мејл адреса има добиено известување со време на поднесено барање и број на предмет, како и известување доколку го поништил претходното барање и поднесол ново барање.

Сo ваквиот систем, Општина Битола, успешно го воведува електронскиот систем за поднесување барања за субвенции, како нова дигитална алатка за граѓаните на општина Битола, со што веќе нема да се создаваат колони од граѓани пред општинската зграда и граѓаните нема да мора да чекаат ред од раните утрински часови, за да аплицираат на јавните повици на општината.

Електронскиот систем за поднесување на барања за субвенции, на барање на Општина Битола, го изработи „Јавен адвертајзинг“ Битола, кој ја овозможи и техничката поддршка на општината во процесот на аплицирање.

Ова е еден од проектите на градоначалникот на општина Битола, Тони Коњановски, со кој се реализира заложбата за дигитализација на услугите.

Градоначалникот на Општина Битола, Тони Коњановски, на денешната седница на Советот, говореше за состојбата на јавните претпријатија во Битола, нагласувајќи дека Битола е во вистински инфраструктурен раст.

Интегрален текст од обраќањето на градоначалникот:

„Денес, кога на дневен ред се наоѓаат завршните сметки за финансиското работење на јавните претпријатија, пред да навлеземе во анализа на бројките, сакам да потенцирам, дека во овој период 2021 – 2025, работењето на јавните претпријатија е со значително зголемен обем, со видливи проекти, намален број на вработени и без нови кредитни задолжувања.

Деновиве, од страна на некои политички субјекти, популарно е да се зборува дека „Битола е во стечај“, ставајќи акцент на финансиските извештаи на јавните претпријатија. Но, тука сум да ве уверам дека: Битола е во вистински инфраструктурен раст, за што потврда се бројните инфраструктурни, капитални и други проекти, во чија реализација се вклучени токму нашите јавни претпријатија. Еден од тие проекти започнува и денес, конкретно проектот за реконструкцијата на улицата „11 Март“.
Денес кога можеме да се пофалиме со успешно отпочнување на процесот на електронско аплицирање за субвенционирање за дограма и реално спроведување на дигитализација, за жал сеуште мораме да зборуваме и за канализација, во која на многу локации со децении не беше инвестирано.
На минатата седница, споменав, а денес сакам да повторам дека, Општина Битола, во делот на капиталните расходи, има значително зголемен процент на реализација, во споредба со периодот од 2018 до 2021, кога реализацијата била од 38,17% до максимум 64,21%, а во последните 3 години се движи од 71,52% до максимум 77,38% а за 2024 овој процент изнесува 72,75 %.

Тука повторно ќе споменам дека, реализацијата на проектите на општината, активно ги вклучува нашите јавни претпријатија, кај кои наскоро добрата организација и проектите кои ќе следуваат, ќе имаат позитивно влијание врз финансиската состојба на претпријатијата.

Тоа што е најважно е дека во овој момент претпријатијата немаат непродуктивни трошоци, имаат значително намалување на трошоците за репрезентација и зголемување на трошоците за плати за вработените, а притоа цените на услугите за граѓаните остануваат непроменети, кај некои претпријатија, веќе 30 години.

Таква е ситуацијата со Јавното претпријатие „Комуналец“, за кое алармиравме од првиот ден на нашето доаѓање како локална самоуправа и затекнатиот кредит од 20 милиони денари од кои немаше ни една уплата и во период од две години целосно е затворен, што се одрази на финансиското работење на претпријатието и покрај зголемувањето на наплатата кај физички и правни лица, кои со години не плаќале, но и намалување на трошоците за спонзорства и репрезентации, кои се намалени за 3 до 4 пати. Тоа значи дека, по основ на спонзорства и репрезентации, Комуналец потрошил во 2018 година, 3 милиони и 900 илјади денари, во 2019 – 4 милиони и 800 илјади денари, а минатата година потрошени се 1 милион и 300 илјади денари. Бројот на вработени во претпријатието во 2024 е за 30 вработени помал од тој во 2021, а ЈП Комуналец има проширена дејност на управување со прифатилиштето за бездомни животни „Хачико“ и Стадионот „Петар Милошевски“. Тука би напоменал и дека годишно за плати и придонеси на вработените ЈП Комуналец во 2021 година исплатил 105 милиони, а во годината што измина 2024 – исплатил 171 милион денари, а ова е резулат на неколкукратното зголемување на платите на вработените во ова ЈП.

Кај ЈП „Нискоградба“, исто така намален е бројот на вработени, а со покачувањето на платите, зголемени се трошоците за плати, од околу 62.000.000 во 2021 на околу 85.000.000 во 2024, претпријатието минатата година не потрошило ниту денар за адвокатски услуги, а во 2019 тој трошок бил 326.444 денари, а истата година претпријатието потрошило и 785.968 денари за репрезентација, што е скоро 7 пати повеќе од средствата потрошени по овој основ минатата година, кои изнесуваат 109.717 денари.

Нема „да секнат ниту чешмите во Битола“, како што деновиве слушнавме одредени обиди за манипулирање на јавноста. Сегашната загуба на „Водовод“, изнесува онолку колку што чинеше целосно непотребната инвестиција на претпријатието започната во 2021 година за изградба на нова управна зграда, за што се потрошени повеќе од 60 милиони денари.
Освен оваа непотребна инвестиција, која мораше да се исплати, претпријатието денес има 22 вработени помалку од 2021 година, но зголемени трошоци за плати за 41 милион денари. Покрај ова, зголемени се трошоците на претпријатието за електрична енергија и сирова вода кон Стрежево, заради сушата минатото лето.

Трошоците за адвокатски услуги на претпријатието кои во периодот 2018 – 2021 година, изнесувале астрономски 8.757.753, во 2021 – 2024 година биле 2.660.479, а трошоците за репрезентација од 2.452.934 во периодот 2018 – 2021, во 2021 -2024 се намалени и изнесуваат 903.827 денари.

Накратко, денес зборуваме за одредени финансиски загуби, кои во голема мера се последица на непланското менаџирање со јавните претпријатија до 2021 година, за што т.н данок или долговите ги доисплативме сега, без да удриме врз џебот на граѓаните. Ниту кога дојдовме не сакавме да губиме време со обвинувачки прес конференции, ниту сега нема да го ставиме фокусот на тоа, затоа што за истраги постојат соодветни органи.

Ќе продолжиме со работа, затоа што пред нас за реализација се 16 нови проекти за кои се одобрени средства од Владата и двојно повеќе кои наскоро ќе бидат аплицирани и чија реализација ќе се врши заедно со јавните претпријатија“, нагласи градоначалникот Коњановски во своето обраќање пред советниците во Советот на општина Битола.