Премиерот Христијан Мицкоски денеска ја презентираше резултатите од четиридневната посета на Обединетите Арапски Емирати (ОАЕ), на која пред инвеститорите беа изложени повеќе инфраструктурни проекти, како што се оние од транспортот, енергетиката и туризмот. Меѓу проектите кои привлекле внимание се коридорите 8 и 10, како и инвестиции во Охрид, Попова Шапка, Чебрен и Галиште.

„Ги презентиравме можностите за инвестирање во Македонија и работиме на тоа да се најдеме на мапата на светските инвеститори“, истакна премиерот Мицкоски.

Во изјавата, Мицкоски истакна дека оваа посета, која ја оствари со тимови од Владата и неговиот Кабинет, беше исклучително успешна и ќе претставува значаен чекор напред за македонската економија.

„Разговаравме за инфраструктурни проекти, вклучувајќи ги коридорите 8 и 10, и важното продолжување на коридорот 10-д. Понатаму, дискутиравме за инвестиции во туризмот, особено за нашиот бисер – Охрид, но и за Попова Шапка како важен туристички потенцијал“, додаде Мицкоски.

Тој истакна дека биле разгледувани и можности за изградба на значајни проекти во градежништвото кои ќе станат препознатливи не само во Македонија, туку и на Балканот и пошироко.

„Истовремено, дискутиравме и за инвестиции во енергетиката, посебно хидроцентралите на Река Црна – Чебрен и Галиште, како и потенцијалот за нови соларни и ветерни капацитети“, рече Мицкоски.

Тој посочи дека посетата е оценета со највисока оценка, како економски така и политички успех, бидејќи повторно се воспоставува близок однос со Обединетите Арапски Емирати, по долгата пауза во соработката.

Двајца од повредените во пожарот во Пулс сè уште во тешка состојба – 45 лица на лекување во странство

Двајца од повредените во пожарот што се случи на 16 март во дискотеката „Пулс“ во Кочани, кои моментално се лекуваат во странство, се наоѓаат во релативно тешка здравствена состојба. Ова попладнево го соопшти заменик-министерот за здравство, Јовица Андовски, на прес-конференција.

Во моментов, вкупно 45 пациенти се лекуваат надвор од земјата.

Во текот на денешниот ден, се очекува транспорт на пациент од Солун, кој ќе го продолжи лекувањето на Клиниката за пластична хирургија во Скопје, каде веќе се наоѓа една пациентка.

Утре, од Ниш треба да пристигне уште еден пациент, кој ќе биде хоспитализиран во болницата „Стара градска“, каде што веќе се лекуваат две лица. Дополнително, уште двајца пациенти се згрижени во приватна болница во Скопје.

Црвениот крст исплати над 86 милиони денари помош за семејствата настрадани во пожарот во Кочани

Заклучно со 17 април 2025 година, преку апелот на Црвениот крст на РСМ собрани се вкупно 128.011.651 денар наменети за поддршка на настраданите од трагичниот пожар во Кочани.

Денес, Црвениот крст изврши трансфер на средства кон 62 семејства на починатите лица. Со оваа исплата, досега се распределени вкупно 86.100.000 денари.

Организацијата, во соработка со своите партнери, продолжува со обезбедување психосоцијална и друга неопходна поддршка за погоденото население, стои во соопштението.