Оваа година полуфиналисти на Лигата на шампиони се – Арсенал и Пари Сен Жермен, односно Барселона и Интер. 

Полуфиналните натпревари се играат на 29 и 30 април, односно 6 и 7 мај, што значи дека сите учесници ги очекува интензивен распоред во претстојниот период. Сепак, Барселона има убедливо најтежок распоред, бидејќи за само 15 дена ќе игра двојно натпреварување со Реал Мадрид и двојно натпреварување со Интер! 

Барса прво ќе се соочи со Реал во финалето на Кралскиот куп на 26 април, а само четири дена подоцна го дочекува Интер во првиот натпревар. Потоа следи единствениот полесен натпревар, гостување кај Ваљадолид, а потоа нови два натпревари – реванш со Интер и ново, лигашко „Ел класико“ на 11 мај на „Монжуик“. 

Кога ги гледаме останатите учесници во полуфиналето, на Пари Сен Жермен и Арсенал им е најлесно, бидејќи можат само да се фокусираат на Лигата на шампионите. ПСЖ веќе ја освои Лига 1, Арсенал не може да ја освои Премиер лигата, а е исфрлен и од ФА купот и целата концентрација е на полуфиналето на ЛШ.

Интер е најблизок до Барселона поради тоа што сè уште се бори за Скудето, но и за финале на Купот на Италија. 

Интер игра реванш полуфинале на Купот на Италија со Милан на 23 април, потоа го дочекува Рома во Серија А, а меѓу двојниот натпревар со Барса го дочекува Верона и по дуелите со Каталонците гостува на Торино. 

Интер по бројот на натпревари се споредува со Барселона, но јасно е дека на хартија сепак е полесно да се игра со Рома и Верона дома, отколку двојниот натпревар со Реал Мадрид во тој густ распоред.

Термините за полуфиналето на Лигата на шампиони се:

29 април: Арсенал – ПСЖ
30 април: Барселона – Интер

6 мај: Интер – Барселона
7 мај: ПСЖ – Арсенал

На емотивен и солидарен фудбалски спектакл во Скопје, Црвена звезда го совлада Вардар со 3:1 во хуманитарен натпревар, чиј целосен приход ќе биде дониран на семејствата на жртвите од трагичниот пожар во дискотеката во Кочани, во кој загинаа 61 лице, а беа повредени речиси 200, главно млади луѓе.

Натпреварот се одигра пред полни трибини и во силно емотивна атмосфера, бидејќи ова беше првото гостување на белградскиот клуб во Скопје по цели три децении.

Вардар прв дојде до водство со голот на Маневски во 27. минута, кој по прекрасна соло акција реагираше емотивно – го соблече дресот и покажа маица со името на Андреј Лазаров, млад фудбалер на Шкупи кој трагично го загуби животот во пожарот.

Црвена звезда, сепак, ја оправда улогата на фаворит. Со два брзи гола пред полувремето, преку Илиќ во 41. и капитенот Ктаи во 44. минута, направи пресврт. Конечните 3:1 ги постави Урош Сремчевиќ во 87. минута по прецизен удар од работ на шеснаесетникот.

Натпреварот беше повеќе од игра – беше симбол на солидарност, поддршка и човечка поврзаност во моменти на голема тага.

Официјално е!

Со голема гордост објавуваме дека почесната пратеничка за Cooper, Гед Керни (Ged Kearney MP), вети инвестиција од 1,5 милиони австралиски долари за изградба на ново синтетичко фудбалско игралиште на теренот 4 во B.T. Connor Reserve, како дел од нејзиното изборно ветување.

Претседателот на клубот, Давид Цветковски, изјави:

„Во последните пет години работевме неуморно како тим за да ја подготвиме студијата за изводливост. Ова е огромен чекор напред за нашиот клуб и за пошироката заедница – изградба на висококвалитетен терен, достапен во сите временски услови, кој ќе им служи на играчи од сите возрасти во нашата развојна програма, како и на пошироката заедница во Даребин. Целта е да се создаде простор кој поттикнува учество, инклузија и иднина за аматерскиот фудбал во северниот дел од Мелбурн.“

Изразуваме голема благодарност до почесната пратеничка Гед Керни, пратеникот Нејтан Ламберт (Nathan Lambert MP), како и до Градот Даребин, градоначалничката Кристин Оларис и сите советници кои постојано го поддржуваат развојот на спортот во заедницата.