Свет

Откриен тајниот план за Украина? Деталите кои го вознемирија светот, што може да се случи со Украина?

Украина ја одби Москва, но може да заврши во канџите на американските корпорации

По речиси една деценија борба за независност од руското влијание, Украина се соочува со нов предизвик – опасноста од економска зависност од Соединетите Американски Држави. Иако земјата ја одби опцијата за мировни преговори со Русија и избра воена одбрана, сега се отвора ново прашање: ќе стане ли Украина нов економски плен на американските интереси?

Според извештај на Deutsche Welle, по доаѓањето на власт и неговите тврдења дека ќе стави крај на војната во рок од 24 часа, Доналд Трамп го насочи вниманието кон природните ресурси на Украина, особено ретките минерали. Иако договорот сè уште не е официјализиран, неговата администрација веќе работи на услови кои, според украинските политичари, можат да се протолкуваат како економско ропство.

Клучна точка на судир меѓу Киев и Вашингтон стана прашањето за контрола врз експлоатацијата на ретките минерали, како и гасоводот кој до скоро служеше за извоз на руски гас во Европа. Плановите на Вашингтон предвидуваат гасоводот да биде под надзор на државната американска агенција International Development Finance Corporation (IDFC).

Украинскиот опозициски пратеник Јарослав Железњак, член на партијата „Голос“, изрази незадоволство од предложените услови:
„Неприфатливо е тоа што сите износи треба да се пресметуваат во долари, а приходите да се чуваат надвор од Украина“, напиша тој на својот Телеграм канал.

Според предлог-договорот, приходите најпрво би се префрлале во САД, а Украина би добила дел дури откако ќе ја отплати сета воена и економска помош добиена од Вашингтон од почетокот на инвазијата. Дополнително, доколку профитот не ги исполни очекувањата, Киев ќе мора да ја надомести разликата од сопствени средства.

Претседателот Володимир Зеленски, кој неформално им се обрати на украински новинари, посочи дека зад зголемениот американски апетит стои министерот за финансии Скот Бесент. Тој истакна дека Киев не може да ги прифати сите нови барања, особено правото на вето од страна на САД врз сите идни инвестиции поврзани со експлоатацијата на минералните ресурси.

Дополнителна загриженост постои и во однос на европската интеграција на Украина – ваков договор со САД може да влезе во судир со регулативите на Европската Унија, за која земјата има јасна аспирација.

Украинската потпретседателка и министерка за правда, Олга Стефанишина, соопшти дека преговорите не се завршени. „Испративме нов предлог до САД минатата недела и сè уште се надеваме на заемно прифатливо решение“, изјави таа.

Сѐ погласни се и споредбите со ситуацијата во Ирак, каде природните богатства беа ставени под контрола на американски компании по инвазијата во 2003 година.

Иронијата е очигледна: Украина се обиде да избега од влијанието на Москва, а сега ризикува да стане економски заложник на Вашингтон.

Свет

Лекарите во Англија стапија во петдневен штрајк

Лекарите во Англија денес започнаа петдневен штрајк поради несогласувања околу платите и условите за работа, јавува Ројтерс.

Станува збор за помладите болнички лекари, познати како „жители“, кои тврдат дека нивните плати во последните години значително се намалиле и дека работат под зголемен притисок и во тешки услови.

Владата, од своја страна, соопшти дека нема фискален простор за значителни покачувања на платите и дека штрајковите се неодговорни, нагласувајќи ја потребата за заштита на здравствениот систем и пациентите.

Свет

Вашингтон најавува нов притисок врз Москва преку енергетски санкции

САД подготвуваат нов пакет санкции насочени кон рускиот енергетски сектор, со цел дополнително да го зголемат притисокот врз Москва доколку рускиот претседател Владимир Путин одбие да прифати можен мировен договор со Украина, објавуваат странски медиуми повикувајќи се на информирани извори.

Според истите извори, меѓу мерките што се разгледуваат е и таргетирање на бродовите од руската флота на нафтени танкери, како и санкционирање на трговците и посредниците кои учествуваат во олеснување на трансакциите поврзани со извозот на руска нафта.

Изворите наведуваат дека станува збор за опции кои сè уште се во фаза на разгледување, а конечната одлука ќе зависи од развојот на дипломатските напори поврзани со војната во Украина.

Според најавите, новите санкции би можеле да бидат објавени уште во текот на оваа недела.

Свет

Мелони: Европа губи време поради внатрешна слабост и бавни одлуки

Италијанската премиерка Џорџа Мелони изјави дека Европската Унија се соочува со сериозни предизвици, предупредувајќи дека најголемата закана за Унијата не доаѓа однадвор, туку од нејзината сопствена неодлучност и неспособност навреме да носи клучни одлуки.

Говорејќи пред пратениците во Долниот дом на италијанскиот парламент, Мелони нагласи дека актуелниот геополитички момент бара прагматичен пристап, ослободен од идеолошки догматизам. Според неа, токму таквиот пристап е неопходен за соодветен одговор на новата безбедносна стратегија на Соединетите Американски Држави.

„Бесмислено и штетно е да се напаѓаат имагинарни непријатели. Вистинскиот проблем е нашата неспособност да изнаоѓаме конкретни и одржливи решенија“, истакна Мелони во пресрет на претстојниот Самит на ЕУ.

Премиерката се осврна и на прашањето за користење на замрзнатите руски средства за поддршка на Украина, оценувајќи дека станува збор за сложен процес кој мора да биде заснован на цврста и правно издржлива основа. Таа ја повтори поддршката на Италија за Украина и ставот дека Русија треба да ги сноси трошоците за војната, но додаде дека Москва поставува, како што рече, „неразумни“ услови во рамките на мировните напори поддржани од САД.

Мелони упати критики и до предлог-буџетот на Европската комисија за периодот 2028–2034 година, оценувајќи дека во сегашната форма е неприфатлив за Италија. Таа посочи дека документот предвидува зголемени финансиски придонеси, но намалени средства за политики кои се од клучно значење за земјата, како заедничката земјоделска и кохезиската политика.

„Нема да прифатиме да плаќаме повеќе, а да добиваме помалку“, порача италијанската премиерка.