Мистериозен механизам кој го нарекуваат најстар компјутер на светот: Компјутерската симулација ги збуни научниците

Механизмот од Антикитера можеби никогаш не функционирал? Аргентински физичари дојдоа до изненадувачки заклучок

Механизмот од Антикитера, пронајден во 1901 година во остатоците од древен брод, веќе повеќе од еден век ги фасцинира историчарите и археолозите ширум светот. Нарекуван „најстариот компјутер на светот“, овој антички уред останува една од најголемите технолошки мистерии на минатото.

Но, нова симулација што ја спроведе тим физичари од Националниот универзитет во Мар дел Плата, Аргентина, внесува сомнеж во тоа колку навистина бил функционален овој неверојатен уред.

Симулација што отвора прашања

Физичарите Естебан Зигети и Густаво Аренас ја објавија својата студија на прeпpинт серверот arXiv, каде ги споделија резултатите од компјутерската симулација на механизмот од Антикитера. Тие тврдат дека грешките во изработката на уредот би можеле толку често да предизвикуваат негово заглавување, што би го направиле речиси неупотреблив.

– Механизмот од Антикитера е базиран на сложен систем од меѓусебно поврзани запчаници. Нашата симулација комбинира две досегашни теории – аналитичкото решение на Алан Торндајк за нерамномерното движење што го предизвикуваат триаголните заби на запчаниците и моделот за грешки во изработката предложен од Мајк Едмундс – наведуваат авторите.

Можеби никогаш не работел?

Резултатите од нивната симулација покажуваат дека самата форма на забите не е критичен проблем, туку дека клучниот недостаток лежи во производствените грешки – неточности во изработката на деловите.

– Или уредот никогаш навистина не работел, или вистинските грешки биле многу помали од оние претпоставени во досегашните модели – заклучуваат Зигети и Аренас. Тие нагласуваат дека, иако е тешко да се поверува дека некој би создал вакво технолошко чудо без функционална вредност, неопходно е да се преиспита дали параметрите што ги користел Едмундс точно ја одразуваат состојбата на оригиналниот уред.

Иако нивната студија сè уште не е рецензирана, отвора нови прашања околу тоа дали легендарниот механизам од Антикитера бил функционален уред или, пак, останал само амбициозен, но несовршен обид за технолошка револуција во антиката.