Папата Франциск, поглаварот на Римокатоличката црква од 2013 година, почина утрово на 89-годишна возраст, соопшти Ватикан, а пренесе Sky News.
„Драги браќа и сестри, со длабока тага морам да ја објавам смртта на нашиот Свет Отец Франциск. Утрово во 7:35 часот, бискупот на Рим, Франциск, се врати во домот на Отецот. Целиот свој живот го посвети на служењето на Господ и Неговата Црква. Нè научи како да ги живееме евангелските вредности со верност, храброст и универзална љубов, особено во корист на најсиромашните и најисклучените“, соопшти кардинал Фарел во официјално обраќање од Ватикан.
Папата Франциск беше избран за поглавар на Католичката црква по историската оставка на неговиот претходник, Бенедикт XVI, кој стана првиот папа во речиси 600 години што се повлече од функцијата.
Во последните години од неговиот понтификат, папата се соочуваше со сериозни здравствени проблеми. Во февруари годинава беше хоспитализиран поради бронхитис, а подоцна му беше дијагностицирана двострана пневмонија. Претрпе и анемија, што доведе до ниско ниво на тромбоцити и потреба од трансфузии. На 22 февруари, Ватикан соопшти дека се наоѓа во критична состојба поради продолжена респираторна криза, а веќе следниот ден му беше дијагностицирано бубрежно попуштање.
Илјадници верници се собираа на плоштадот Свети Петар во молитва за негово оздравување, додека многумина херојски го посетуваа болничкиот центар во Рим, оставајќи цвеќиња и пораки со поддршка.
Папата Франциск остана во болница до крајот на месецот, а лекарите тогаш го оценија неговото здравје како „комплексно“.
