Марџори Тејлор Грин ја разбесни јавноста со спорна објава по смртта на папата Франциск
Само неколку часа по објавата за смртта на папата Франциск, контроверзната американска конгресменка од Џорџија и отворена критичарка на Католичката црква, Марџори Тејлор Грин, предизвика жестоки реакции со својата објава на социјалната мрежа X.
Во понеделник наутро, околу девет часа по потврдата дека папата починал од последици од мозочен удар на Велигденски понеделник, Грин напиша: „Денес се случија големи промени во глобалното водство. Злото е поразено од божјата рака.“
Иако не прецизираше на што точно се однесува, нејзината порака беше протолкувана како радост по смртта на 88-годишниот поглавар на Католичката црква. На барањето за коментар од страна на британскиот The Independent, Грин не одговорила.
Оваа објава предизвика лавина реакции на социјалните мрежи. Корисниците ја обвинија за непримерно однесување и ја осудија како срам за Америка. „Ова е одвратно“, напиша еден корисник, додека друг додаде: „Ти си вистинското зло.“
Новинарката Меган Мекарти иронично се надоврза со коментар: „Мислев дека го сакаш Пит Хегсет?!“ — алудирајќи на актуелниот министер за одбрана, чие место е под закана поради скандал со групен чет.
Инаку, со смртта на папата Франциск започна деветдневен период на жалост, како и процесот за избор на нов поглавар на Католичката црква.
Марџори Тејлор Грин, иако крстена и венчана според католички обред, во 2011 година премина во протестантската евангелистичка црква, каде што беше повторно крстена. Во 2022 година изјави дека ја напуштила Католичката црква бидејќи, како што рече, повеќе не им верувала на нејзините лидери дека ќе ги заштитат децата од педофилија.
И покрај тоа, Грин призна дека има исклучителни верници и чесни свештеници, но тврди дека црковната хиерархија е „под контрола на Сатаната“ и „исполнета со криминалци и злоставувачи“.
