Скопје

Ќе добие ли главниот град нов „Скопски саем“?

По долги години без вистински саемски простор, Владата на Република Македонија ја разгледува можноста за изградба на нов, модерен саемски комплекс во главниот град.

На вчерашната средба меѓу директорот на Службата за општи и заеднички работи на Владата, Ивица Томовски, и претставници на компанијата „Скопски саем“, се дискутирале можни локации, инфраструктурни решенија и идните чекори кон реализација на овој значаен проект.

„Враќањето на ‘Скопски саем’ во сопствен објект не само што ќе ја оживее економската активност, туку и ќе го зајакне регионалниот и меѓународниот профил на Македонија како важен трговски и деловен центар“, изјави Томовски по средбата.

Од страна на „Скопски саем“ беше изразена подготвеност за соработка со државните институции во процесот на подготовка и реализација на проектот.

„Саемите се многу повеќе од обични изложби. Тие се двигатели на економијата, алатки за промоција на домашните производи, но и средби каде се отвораат нови бизнис можности и соработки. Недостигот од соодветен простор последниве години е сериозен хендикеп за нашата земја“, нагласи директорката на „Скопски саем“, Даниела Глигоровска.

Таа додаде дека со изградбата на модерен саемски објект, Македонија ќе може повторно да се позиционира како важен играч на балканската саемска мапа.

Жителите на Скопје се израдуваа на најавата од Владата.

Жителите сметаат дека ова ќе биде добра инвестиција.

„Конечно! Главен град без саем, единствен во регионот. Само ние трампавме саем за застарен концепт на мол-лименка и станбени згради! – гласи еден од коментарите на темава.

Некои сметаат дека овој комплекс треба да биде надвор од Скопје.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.