Фиона Хил: Доналд Трамп сака да владее како Владимир Путин
Поранешната советничка за национална безбедност на Доналд Трамп, Фиона Хил, изјави дека поранешниот американски претседател има амбиции да управува со САД на сличен начин како што Владимир Путин владее со Русија. Во интервју за Sky News, Хил оцени дека Трамп и Путин делат речиси идентична визија за светот – како геополитички арена поделена меѓу три големи сили: САД, Русија и Кина, со јасно дефинирани сфери на влијание.
„Трамп сака да се приближи до Путин“
„За прв пат имаме американски лидер кој отворено сака да го имитира рускиот претседател – да креира ултрацентрализирана претседателска власт, со контрола од врвот и минимални проверки и рамнотежа“, рече Хил.
Таа, која од 2017 до 2019 година беше заменичка советник за национална безбедност и директорка за европски и руски прашања, посочи дека Трамп уште од неговиот прв мандат се стремел кон „ресетирање“ на односите со Москва.
„Трамп отсекогаш сакал директно да седне со Путин и да ги реши сите билатерални разлики – од нуклеарната контрола, до економските и бизнис интереси, во кои лично тој и неговиот близок круг се силно вклучени“, изјави таа.
„Сака да ја намали поддршката за Украина и улогата на САД во Европа“
Хил додаде дека Трамп има јасна намера да ја намали американската поддршка за Украина и да ја намали улогата на САД како гарант на европската безбедност.
„Тој сака да ги натера Европјаните да преземат поголема одговорност – не само за Украина, туку и за сопствената одбрана. Целта му е Европа самата да ги дефинира своите безбедносни приоритети, а Украина да разбере дека не може да се потпира на долгорочна американска помош“, нагласи таа.
Изјавите на Хил доаѓаат во чувствителен момент – кога Доналд Трамп јавно објави дека „мировниот договор за Украина е многу блиску“. Само неколку часа по повлекувањето на државниот секретар на САД, Марко Рубио, од преговорите во Лондон, Трамп го повика украинскиот претседател Зеленски „да го реши тоа“.
