САД ќе инсистираат на фер трговски договор со Кина, но разговори на највисоко ниво нема да има оваа недела — изјави американскиот претседател Доналд Трамп, нагласувајќи дека негов приоритет останува заштитата на американските економски интереси.
„Нашите претставници разговараат со многу земји, вклучително и со Кина“, рече Трамп пред новинарите на претседателскиот авион, пренесува агенцијата „Ројтерс“. Тој додаде дека не ја исклучува можноста за објавување нови трговски договори во текот на неделата, но не откри конкретни детали.
Претседателот Трамп веќе воведе 10% царини за голем број земји на 2 април, вклучувајќи и повисоки царински стапки за некои партнери, кои подоцна беа суспендирани на 90 дена. Дополнително, тој најави царини од 25% на увозот на автомобили, челик и алуминиум — меѓу нив и за Канада, Мексико и Кина — при што за Пекинг тарифата достигнува и до 145%.
„Со некои земји можеби нема ни да склучиме договор — само ќе воведеме соодветна царина“, изјави Трамп, најавувајќи одлуки во рок од две до три недели.
