Трамп изрази подготвеност за директна средба со Путин во Турција: Можен пробив за мирот во Украина?
Додека патуваше од Ријад кон Доха, американскиот претседател Доналд Трамп изјави дека е подготвен да отпатува во Турција на разговори за Украина, доколку и рускиот претседател Владимир Путин реши да присуствува на тие преговори, јавува AFP.
„Не знам дали Путин би дошол ако јас не бидам таму“, изјави Трамп пред новинарите и додаде: „Знам дека би сакал да бидам таму, и тоа е една од опциите. Ако постои можност да ја прекинеме оваа војна, ќе размислам сериозно за тоа.“
Американскиот претседател најави и можност да ја посети Турција како дел од неговата турнеја низ Блискиот Исток во текот на оваа недела. Според официјални извори од Вашингтон, државниот секретар Марко Рубио утре ќе присуствува на мировните разговори меѓу Русија и Украина, кои се очекува да се одржат во Турција.
Од руската страна, претседателот Владимир Путин, по добиениот ултиматум од неколку европски лидери да прифати 30-дневен прекин на огнот или да се соочи со нов бран санкции, изјави дека Русија е подготвена за директни преговори со Украина во Истанбул на 15 мај.
Украинскиот претседател Володимир Зеленски одговори дека е подготвен да се сретне со Путин лице в лице, но од Кремљ засега нема официјален одговор.
„Путин е тој што ја носи конечната одлука во Русија. Ова е негова војна, и затоа преговорите треба да бидат директни со него“, изјави Зеленски во своето синоќешно видео-обраќање.
Тој додаде дека украинската делегација активно ја подготвува посетата на Турција и дека „секоја порака што води кон безусловен и долгорочен прекин на огнот е од клучно значење.“
Зеленски предупреди дека евентуалното одбивање на Путин да учествува на директна средба во Турција ќе биде „конечен доказ дека Русија не е искрено заинтересирана за постигнување мир.“
