Израелските вооружени сили во моментов контролираат повеќе од 77 проценти од територијата на Појасот Газа, соопштија локалните власти во неделата, повикувајќи се на податоци од теренот и верификувани анализи.
„Достапните информации укажуваат дека израелските окупациски сили ефективно ја контролираат приближно 77 отсто од географската површина на Газа,“ се наведува во соопштението на владината медиумска канцеларија на Газа.
Според нив, контролата е воспоставена преку директни копнени офанзиви, распоредување на трупи во станбени и цивилни подрачја, како и спречување на палестинските жители да пристапат до сопствените домови, земјиште и имот – најчесто преку засилено оружено делување или присилна евакуација.
Канцеларијата остро ги осуди израелските планови, квалификувајќи ги како обид за масовно раселување, етничко чистење, систематски геноцид и насилен колонијализам под закрила на опсада и тотална воена агресија насочена и кон населението и кон инфраструктурата.
Во соопштението се наведува дека целосна одговорност за, како што велат, „злосторството на геноцид“ во Газа сноси Израел, заедно со неговите сојузници – САД, Обединетото Кралство, Германија и Франција.
Израелскиот дневен весник Israel Hayom минатата недела објави дека воените сили имаат за цел да воспостават контрола над 70 до 75 отсто од територијата на Газа во рок од три месеци, како дел од проширената воена кампања во енклавата.
И покрај бројните меѓународни повици за прекин на огнот, Израелската армија од октомври 2023 година спроведува интензивна воена офанзива врз Појасот Газа, во која, според последните податоци, животот го загубиле над 53.900 Палестинци, главно жени и деца.
Во ноември минатата година, Меѓународниот кривичен суд издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант поради сомнежи за воени злосторства и злосторства против човештвото во Газа.
Покрај тоа, Израел се соочува со тужба за геноцид пред Меѓународниот суд на правдата, поднесена поради, како што се наведува, воени злосторства извршени врз беспомошното цивилно население во палестинската енклава.
