Актуелниот градоначалник на Крива Паланка, Сашко Митовски, и официјално ќе се бори за нов мандат, објави лидерот на СДСМ Венко Филипче на трибината „Мугра на слободата“, одржана синоќа во Крива Паланка.
– Крива Паланка е општина која доживеа вистинска трансформација. Денес ја честитам кандидатурата на Сашко Митовски и сум сигурен дека ќе следи и победа, изјави Филипче.
Митовски во своето обраќање истакна дека Крива Паланка станува модерен и европски град. Во изминатите 3,5 години, реконструирани се над 50 улици, изградени нови водоводи и канализации, 12 нови детски катчиња, а целосно е уреден и градскиот кеј. Општината добила нов Генерален урбанистички план по речиси 40 години, како и функционален модел за долгорочен развој.
Митовски потенцираше дека буџетот е 100% реализиран, со вложувања во градинки, училишта, спортска и социјална инфраструктура, како и ваучери за лица со попреченост и бесплатни летувања за деца од семејства во ризик.
Како идни приоритети ги наведе реконструкцијата на главната улица, изградба на монтажна катна гаража со 166 паркинг места, зонско паркирање, пат до Калин Камен и нови хотелски инвестиции. Посебен акцент стави на експресниот пат Ранковце – Крива Паланка вреден 93,7 милиони евра и рехабилитација на регионалните патишта, проекти вредни над 120 милиони евра.
– Ова не е време за експерименти. Време е за заштита на постигнатото и нов силен чекор напред, порача Митовски.
На трибината се обрати и пратеникот Љупчо Николовски, кој најави дека „слободата и победата ќе тргнат од Крива Паланка“.
