Унгарскиот премиер Виктор Орбан повторно остро се спротивстави на можниот влез на Украина во Европската унија, ветувајќи дека ќе направи сè за да го блокира нејзиното приклучување. Тој ја обвини Европската комисија дека ја турка Украина кон членство без реална анализа на последиците и предупреди на сериозни економски штети по европските држави.
„Украина би ја проголтала секоја поддршка што досега им ја даваме на европските земјоделци, индустријата и семејствата. За десет години не би можел да спијам мирно ако сега не направам сè за да ја заштитам Унгарија и ЕУ од овој бриселски сон,“ изјави Орбан.
Будимпешта веќе ја блокираше следната фаза од преговорите за членство на Украина и најави дополнителни опструкции, особено по обвинувањата од страна на украинската Служба за безбедност дека открила унгарска шпионска мрежа на западот од земјата.
Во март, унгарската влада започна национална анкета за ставот на граѓаните во врска со украинската кандидатура. Анкетата беше критикувана поради мала излезност и прашања што, според аналитичари, биле насочени кон одбивање на членството.
Иако лидерите на ЕУ посочија 2030 година како можен датум за пристапување на Украина, Орбан предупредува дека Унгарија ќе го искористи своето право на вето во секоја фаза од процесот. Брисел, пак, најави дека има алтернативни планови ако Унгарија продолжи со блокадите.
