Петнаесетгодишник уапсен по вооружен напад врз колумбиски претседателски кандидат
Колумбискиот претседателски кандидат Мигел Урибе Турбеј (39) беше тешко ранет во вооружен напад за време на предизборен митинг во Богота. Според извештаите на локалните медиуми, Урибе бил погоден со три проектили, од кои два во главата, и се наоѓа во критична состојба.
Нападот се случил во саботата, додека Урибе се обраќал пред група граѓани во еден градски парк. Сведоци изјавиле дека по истрелите настанала паника, а кандидатот бил итно пренесен со хеликоптер во клиниката „Санте Фе“, каде што се собрале негови поддржувачи.
Полицијата уапси 15-годишен осомничен на самото место. Мотивите засега не се познати, но истрагата е во тек.
Партијата на Урибе, Демократски центар, остро го осуди нападот, оценувајќи го како директна закана за животот на нивниот кандидат, но и за демократијата и слободата во Колумбија.
Во официјално соопштение, болницата потврди дека Урибе бил застрелан во коленото и двапати во пределот на главата. Медицинските тимови се борат за неговиот живот.
Колумбиската влада нападот го оцени како „тежок чин на политичко насилство“, а претседателот Густаво Петро го поврза обидот за атентат со делување на криминална група предводена од Албанецот Дритан Ѓика. Тој повика на итна акција за спречување на ескалација на политичкото насилство во земјата.
