Искусниот британски фотожурналист Ник Стерн (Nick Stern) бил погоден со проектили од полицијата додека известувал од протест во Лос Анџелес, при што претрпел тешка повреда на ногата. За BBC од болнички кревет раскажа дека бил погоден со т.н. „несмртоносен“ куршум со должина од 7,5 сантиметри, кој продрел низ кожата и оставил рана со дијаметар од 5 сантиметри.
„Овој пат беше поинаку. Имам длабока рана. Тоа не беше само модринка. Куршумот навистина ми ја проби кожата“, вели Стерн, кој бил подложен на операција и сега му претстои долготрајна физикална терапија.
Стерн, кој има повеќе од 30 години искуство, потенцира дека секогаш носи новинарска идентификација и не се крие додека работи. „Во моментот кога бев погоден, стоев насред улица, не зад автомобил или зграда. Се обидувам секогаш да бидам јасно видлив“, додава тој.
Не е јасно дали Стерн бил намерно цел на полицијата. „Можеби целеле во некој близу мене, не знам. Не можам да кажам“, изјави тој.
Од шерифовата канцеларија на округот Лос Анџелес велат дека не можат да дадат изјава без официјална жалба, но додаваат дека се посветени на безбедноста на новинарите и граѓаните.
Полицијата во Лос Анџелес користи таканаречено „помалку смртоносно“ оружје за растерување на толпата, меѓу кои се гумени куршуми, проектили од пена (спужвасти гранати) и солзавец. Иако се сметаат за несмртоносни, овие средства можат да предизвикаат сериозни телесни повреди, па дури и фатални последици.
