Градоначалничката на Лос Анџелес, Карен Бас, остро го критикуваше решението на американскиот претседател Доналд Трамп да ја испрати Националната гарда во градот без согласност од државата, оценувајќи го тоа како „опасна ескалација“ која предизвика страв и паника меѓу граѓаните.
„Она што моментално го гледаме во Лос Анџелес е хаос предизвикан од администрацијата на Трамп“, изјави Бас. Таа додаде дека граѓаните имаат право да протестираат, но не и да рушат и уништуваат, и порача дека насилството нема да биде толерирано.
Градоначалничката повторно повика на повлекување на Националната гарда и предупреди дека градот не смее да падне во замката која, според неа, му е поставена од администрацијата: „Не сакаме да играме по нивните правила.“
Воедно, Бас потенцираше дека сите жители на Лос Анџелес се добредојдени без разлика на потеклото: „Не е важно од каде сте или кога сте пристигнале. Овде сте добредојдени.“
Во градот веќе неколку дена траат протести по федералните рации и депортации на мигранти, а ситуацијата дополнително се заостри кога претседателот Трамп нареди распоредување на Националната гарда, што предизвика осуди од Калифорнија и најави за тужби против Белата куќа.
