Грета Тунберг: „Не киднапираа на отворено море додека носевме хуманитарна помош за Газа“

Шведската климатска активистка Грета Тунберг пристигна во Париз откако беше депортирана од Израел, каде беше уапсена за време на обидот за пробивање на израелската поморска блокада на Газа.

На прес-конференција одржана на аеродромот „Шарл де Гол“, 22-годишната Тунберг изјави дека израелските сили ја „заробиле во меѓународни води“, заедно со група пропалестински активисти кои пренесувале хуманитарна помош кон опколената енклава.

„Не држеа на дното на бродот, без право да излеземе. Но, вистинската приказна не сме ние 12-те. Вистинската приказна е геноцидот што се случува во Газа и систематското изгладнување на населението. Не смееме да замижиме пред тоа“, порача Тунберг.

Инцидентот се случил кога бродот на една хуманитарна организација се приближил до територијалните води на Газа, по што бил пресретнат од израелската морнарица. Активистите биле уапсени, приведени и подоцна депортирани. Тунберг потврди дека за време на притворот биле изолирани и дека им било забрането да комуницираат со надворешниот свет.

Израелските власти, пак, тврдат дека станува збор за „пропагандна акција во корист на Хамас“, додавајќи дека малата количина хуманитарна помош што ја пренесувале активистите ќе биде пренасочена кон Газа, но исклучиво преку „овластени хуманитарни канали“.

Грета Тунберг, позната по својот бескомпромисен активизам, во последно време отворено се залага и за палестинското прашање, редовно критикувајќи ги израелските воени операции и повикувајќи на итна интервенција од страна на меѓународната заедница.