Уставниот суд на Бугарија го прогласи за недозволено барањето на претседателот Румен Радев, со кое тој се спротивстави на одлуката на претседателката на парламентот, Наталија Киселова, да не дозволи разгледување на иницијативата за распишување референдум за воведување на еврото како официјална валута од 1 јануари 2026 година.
Со оваа одлука, станува извесно дека во Бугарија нема да се одржи референдум за замената на левот со еврото, што практично ја затвора вратата за директно народно изјаснување по ова прашање пред планираниот влез во еврозоната.
Претседателот Радев ја објави иницијативата за референдум на 9 мај, Денот на Европа, во телевизиско обраќање до јавноста. Барањето го достави до парламентот една недела подоцна, но спикерката Киселова веднаш го одби како противуставно. По ова, Радев се обрати до Уставниот суд, кој сега едногласно го отфрли случајот како неоснован.
Во одлуката, Судот оценува дека не е негова надлежност да пресудува дали парламентот е должен да се изјасни по иницијативи за референдум поднесени од претседателот на државата, ниту дали претседателот на Собранието има право да ги одбие.
Иако одлуката беше донесена со мнозинство, судиите Атанас Семов, Сашо Пенов и Јанаки Стоилов изразија издвоено мислење, а посебна белешка приложи и судијката Невин Фати.
Одлуката доаѓа во момент на зголемени дебати во бугарското општество околу подготвеноста на земјата за приклучување кон еврозоната и замена на левот со еврото.
