Борбената група предводена од американскиот носач на авиони USS Gerald R. Ford треба да биде распоредена во Европа веќе следната недела, во близина на Блискиот Исток, потврдија висок американски претставник и два извора упатени во операцијата. Со тоа, трет носач на авиони на САД ќе биде позициониран во непосредна близина на растечките тензии меѓу Израел и Иран.
Распоредувањето на носачот во оперативната зона на Европското командно подрачје било планирано уште кон крајот на минатата година, но актуелната безбедносна состојба го забрза процесот. Се очекува USS Ford да се позиционира во источниот дел на Средоземното Море, во близина на Израел.
Паралелно со ова движење, уште еден американски носач се упатува кон регионот на Блискиот Исток, каде се очекува или да му се приклучи на USS Carl Vinson, или да го замени, објави CNN.
Американската морнарица користи носачи на авиони како симбол на воена моќ, особено во кризни ситуации. Тие носат десетици борбени авиони способни за офанзивни операции, воздушна одбрана и пресретнување ракети и дронови. Носачите се придружени од борбени бродови кои обезбедуваат заштита од копнени, морски и подводни закани.
Распоредувањето на трет носач се оценува како стратегиски сигнал на подготвеност и одвраќање, во светло на засилените геополитички тензии во регионот.
