Република

Инспекторот од Битола под истрага за дивоградба останува суспендиран – Агенцијата за администрација ја потврди одлуката

Инспекторот од Општина Битола, кој е под предистражна постапка поради сомнеж за дивоградба во селото Дихово, нема да се врати на работното место додека трае истрагата против него. Агенцијата за администрација ја отфрли неговата жалба и ја потврди суспензијата донесена од општинскиот секретар Борче Димитровски.

Како што дознава „АПЛА“, административниот службеник, чиј идентитет не се открива официјално, но чии иницијали се К.М, бил суспендиран уште во мај оваа година. Одлуката следела по информациите што излегоа во јавноста дека токму тој е сопственик на луксузна вила со базен во селото Дихово, објект за кој се сомнева дека е изграден без соодветни дозволи.

Случајот се обелодени во рамки на голема акција на Општина Битола за справување со дивоградбите во Потпелистерието, конкретно во селото Дихово и населбата Довлеџик, која беше спроведена веднаш по трагедијата во Кочани.

„Комисијата за одлучување по жалби и приговори донесе одлука со која приговорот на административниот службеник се одбива како неоснован, а решението од секретарот на Општина Битола се потврдува“, стои во одговорот на Општината. Во решението било наведено дека неговото присуство на работното место би можело да го попречи утврдувањето на одговорноста и да ја наруши институционалната работа.

Обвинителството во Битола уште во април потврди дека е отворена предистражна постапка за сторени кривични дела, а Општина Битола денеска информираше дека се преземени сите правни механизми за разрешување на случајот.

Градоначалникот Тони Коњановски изјави дека суспензијата е дел од пошироките напори на општината за зачувување на интегритетот на јавната администрација и непречено функционирање на институциите.

Извор: АПЛА.мк

Република

Коњановски ги прими просветните работници на годината од Битола

Градоначалникот на Битола, Тони Коњановски, денеска оствари средба со добитничките на признанието „Просветен работник на годината“ за учебната 2024/2025 година – Наташа Тодоровска, наставник по одделенска настава во ОУ „Ѓорѓи Сугарев“, и Аница Б. Златевска, психолог во ОУ „Коле Канински“.

Коњановски им честиташе за значајното признание доделено од Министерството за образование и наука и Сојузот на просветни работници, нагласувајќи дека ваквите награди се симбол на поширока општествена заложба за почит и вреднување на улогата на наставниците, воспитувачите и стручните соработници во образованието.

Тој истакна дека трудот на просветните работници е фундаментален за формирањето на идните генерации и дека локалната самоуправа ќе продолжи да ја поддржува нивната работа.

Признанијата се доделуваат во рамките на кампањата „Магијата е во знаењето“, која Министерството ја реализира по повод 5 Октомври – Светскиот ден на учителите, со цел истакнување на незаменливата улога на учителите и зголемување на општествената почит кон нив.

Република

Мал авион се сруши во Мавровско Езеро, едно лице повредено

Мал авион утрово се урна во Мавровско Езеро, при што две лица се наоѓале во леталото, а едното од нив е повредено. Инцидентот бил пријавен на бројот 112, по што информацијата веднаш била проследена до надлежните служби.

Директорот на Центарот за управување со кризи, Мухамед Али, изјави дека ЦУК ја информирал СВР Тетово, Итната медицинска помош и Регионалниот центар за управување со кризи – Тетово за потребната итна интервенција.

Екипите веднаш излегле на терен и работат на извлекување и обезбедување на лицата од авионот, како и на утврдување на причините за падот.

Извор: тв21

Република

Проданоски ги повика прилепчани на заедничко одбележување на Свети Никола

Градоначалникот на Прилеп, Дејан Проданоски, упати покана до граѓаните да присуствуваат на централното одбележување на Градската слава и патрониот празник на градот – Свети Никола. Оваа година се одбележуваат 20 години од прогласувањето на Свети Никола за заштитник на Прилеп, значаен јубилеј кој, како што истакна Проданоски, го зацврстува чувството на заедништво и традиција.

Свеченото одбележување ќе започне во 08:00 часот со литургија во храмот „Св. Благовештение“. Во 12:00 часот пред параклисот „Св. Никола“ ќе се одржат водоосветување и прережување на славскиот колач, по што граѓаните заедно ќе се упатат кон плоштадот „Александрија“. На плоштадот ќе биде поставена традиционалната светиниколска посна трпеза, а празничната атмосфера ќе ја збогати настапот на групата „Тајфата“ на Камената бина.

Проданоски ги повика сите прилепчани, како и граѓаните од цела Македонија, да се приклучат на прославата и да го одбележат празникот со заедничка радост и достоинство.