Во продолжение ви го пренесуваме целосниот говор на Првиот заменик на претседателот на Владата, г. Изет Меџити, по повод усвојувањето на овој закон:
Почитувани претставници на медиумите,
Почитувани граѓани,
Владата на Република Северна Македонија, на денешната своја седница, го усвои Предлог-законот за правична и соодветна застапеност.
Овој предлог-закон означува историски момент, бидејќи за првпат правичната и соодветна застапеност, како уставна категорија од 2001 година, добива јасно и целосно законско решение.
Иако требаше да биде уредено со закон уште од 2003 година, ова прашање беше оставено како залог на политичката волја повеќе од две децении.
Законот гарантира:
-Еднаква пристапност до вработување и напредување во јавната администрација;
-Правична и соодветна застапеност на сите заедници во јавните институции, притоа обезбедувајќи вработувањето и напредувањето да се вршат врз основа на заслуги и квалификации на секој поединец;
-Создавање институционални и процедурни механизми за спречување на дискриминацијата и зајакнување на инклузивноста.
Овој задоцнет, но неопходен чекор, конечно ја отстранува правичната застапеност од влијанието на дневната политика и ја претвора во законско право за секој граѓанин, без разлика на етничката припадност.
Усвојувањето на овој предлог-закон е доказ дека кога постои искрена политичка волја, резултатите не изостануваат. Со оваа одлука, Владата испраќа јасен сигнал за изградба на пофункционална, поправедна и навистина репрезентативна јавна администрација.
