На фронтот во Украина, руската војска развива сѐ порадикални методи на борба. Последниот тренд, според извештаите од теренот, е употребата на мали моторцикли – наречени „железни коњи“ – за самоубилачки напади на првата борбена линија.
Во нападите учествуваат групи од 10 до 20 моторциклисти кои се движат во ширина до 400 метри и тргнуваат кон украинските позиции во зора, кога видливоста е слаба. Целта се најчесто оператори на дронови и минобацачи – единици кои се клучни за украинската одбрана, но и најмалку заштитени на блиска далечина.
„Не е тоа бесмислена смрт. Ако го повторуваат постојано, ние мораме да трошиме време и ресурси за да ги лоцираме преживеаните. Тоа им овозможува да напредуваат“, изјави украинскиот поручник Евхен.
Иако повеќето моторциклисти се елиминираат со украинска артилерија или дронови, некои – кога сфаќаат дека нема да успеат – самите се разнесуваат со рачни гранати. Другите, кои ќе преживеат, завршуваат во заробеништво.
Мотонападите започнале како импровизирана тактика на фронтот кај Торецк во март, но денес, според „The Times“, руското Министерство за одбрана планира половина од пешадијата да ја опреми со моторцикли, квадови и лесни баги возила. Со ова се обидуваат да ја надминат доминацијата на дроновите, кои целосно ја сменија динамиката на војувањето.
Во „сивата зона“ – просторот меѓу двете фронтови, кој во некои региони се протега и до 29 километри – владее постојан хаос. Селата се разрушени, рововите менуваат сопственици, а војниците преживуваат во земунки и напуштени подруми. Патиштата се покриени со заштитни мрежи против напади од воздух, додека снабдувањето сѐ повеќе се врши со т.н. „вампирски дронови“ и копнени беспилотни возила.
Новата фаза на војната, со доза на очај и висока импровизација, покажува колку е брзо технологијата променлив фактор на бојното поле, каде што дроновите и моторциклистите го заменуваат класичното војување со тенкови.
