Спорт

Од НБА паркетот до затворска ќелија: Бен Меклемор осуден на осум години затвор за сексуален напад врз девојка под дејство на алкохол

Поранешниот НБА кошаркар Бен Меклемор (32) е осуден на осум години затвор од судот во Орегон, откако беше прогласен за виновен за сексуален напад врз девојка во алкохолизирана и полусвесна состојба. Инцидентот се случил во 2021 година на приватна забава, а обвинителството го теретеше по три точки: силување од прв степен, незаконска сексуална пенетрација и сексуален напад од втор степен.

И покрај обидите на неговата одбрана да го оспори случајот, судот ја прифати верзијата на жртвата, чие сведочење беше прикажано преку емотивно видео на изрекувањето на пресудата. Таа зборуваше за траумата и тешкотиите со кои се соочувала со години, нагласувајќи колку е тешко да се живее без чувство на правда и завршница.

По поднесената пријава во 2021 година, беше спроведена темелна полициска истрага. Обвиненијата беа официјално покренати во февруари 2024 година, а Меклемор беше уапсен два месеци подоцна. Со оваа пресуда, речиси сигурно се става крај на неговата професионална кошаркарска кариера.

Меклемор беше сметан за еден од најперспективните играчи на својата генерација. Во 2013 година беше избран како седми пик на НБА драфтот од Сакраменто Кингс, а подоцна настапуваше и за Мемфис, Хјустон, ЛА Лејкерс и Портланд. По заминувањето од НБА, кариерата ја продолжи интернационално, играјќи во Кина, Грција, Шпанија и Турција.

Последниот натпревар го одигра за турскиот клуб Меркезефенди, каде постигна 23 поени. Во текот на НБА кариерата одигра 556 натпревари со просек од 9 поени по меч.

Овој случај претставува ново потсетување за сериозноста на сексуалното насилство и неопходноста сторителите да сносат одговорност, без разлика на нивниот општествен статус или спортски успех.

Спорт

Лоши вести за македонскиот ракомет

Европската ракометна федерација (ЕФХ) го одреди новиот формат за Лигата на шампионите, а македонскиот ракометен шампион нема директно учество во најквалитетното натпреварување туку тоа ќе може да го оствари со барање за вајлд-карта.

Извршниот комитет го потврди системот, а рангирањето на федерациите е според резултатите од сезоните 2022/23, 2023/24 и 2024/25. На првите десет места се рангирани следните федерации: Германија, Шпанија, Франција, Данска, Полска, Унгарија, Романија, Португалија, Хрватска и Норвешка, а тоа значи дека овие држави имаат една загарантирано место во Лигата на шампионите. Овие федерации можат да побараат и по две вајлд карти, а ЕХФ ќе додели осум „специјални покани“.

Во натпреварувањето од следната сезона ќе бидат 24 екипи, поделени во шест групи по четири, а дванаесет од нив ќе се пласираат во главната рунда. Другите 12 екипи ќе продолжат во 1/16 финалето од Европската лига.

Спорт

По натпреварот – во полиција: Манасков приведен по напад врз тренерот на Охрид

Суперлигашкото дерби меѓу Пелистер и Охрид заврши со победа за домашниот тим (29-25), но вистинската драма се случи по последниот судиски свиреж, кога спортската сала „Билјанини Извори“ се претвори во арена на неспортски инциденти.

Шокантни сцени го обележаа традиционалното поздравување меѓу играчите. Ракометарот на Пелистер, Дејан Манасков, (33) – член на битолскиот тим, физички го нападна Крсте Андоновски, еден од помошниците во стручниот штаб на Охрид, предводен од Борис Ројевиќ.

СВР Охрид веднаш реагираше. Портпаролот Стефан Димоски потврди:

„На 14.12.2025 година во 20.20 часот, во СВР Охрид приведен е Д.М. (33) ракометен играч од Скопје, член на ракометен клуб од Битола. Тој, по завршување на ракометен натпревар […] при меѓусебното поздравување на играчите, физички го нападнал К.А. помошен тренер на домашниот-охридскиот ракометен клуб. По целосно расчистување на настанот, против напаѓачот ќе биде поднесена соодветна пријава.“

Хаосот не запре во салата. Според извештаите, ракометарите на Пелистер, во налет на бес, целосно ја демолирале соблекувалната на гостинскиот тим.

Атмосферата дополнително се вжешти на улиците на Охрид, каде навивачката група на Пелистер, „Чкембари“, била вклучена во физички пресметки, напаѓајќи локални охриѓани во самиот центар на градот.

Овој инцидент фрла мрачна сенка врз спортскиот дух и бара итна реакција од ракометната федерација. Се очекуваат жестоки казни за неспортското однесување, како на теренот, така и надвор од него.

Спорт

Омерагиќ: Конструктивен состанок за избор на нов селектор на македонската А репрезентација

Како Комисија за избор на нов селектор на македонската А репрезентација, денеска имавме конструктивен состанок, изјави Масар Омерагиќ, претседател на Фудбалската федерација на Македонија (ФФМ).

На состанокот беа разменети размислувања за профилот на македонски тренер кој ќе внесе стабилност, јасна концепција и континуитет во работата со најдобрата селекција.

Предлогот за нов селектор ќе биде доставен до Управниот одбор на ФФМ најдоцна до 25 декември.