Увозот на работна сила од Западен Балкан имал позитивно влијание врз германскиот пазар на трудот, според истражувањето спроведено од Институтот за истражување на пазарот на труд во Нирнберг.
– Околу 54 проценти од вработените во рамките на правилата за вработување на лица од Западен Балкан се квалификувани работници, четири проценти се високо квалификувани, а 42 проценти се помошни работници – произлегува од извештајот.
Новата регулатива за вработување на работници од Западен Балкан се воведе на почетокот на 2016 година, бидејќи земјите од овој регион беа вклучени во списокот на т.н. безбедни земји, што практично ја отфрли можноста за стекнување на азил за граѓаните на овие земји во Германија.
Критичарите тврдат дека ова доведе до тоа да во Германија пристигнуваат исклучиво неквалификувани работници во секторот со пониски плати, како и постари работници, а се вели дека заради нивниот краток работен век до пензија и ниските придобивки од социјалното осигурување по пензионирање, тие ќе паднат на товар на германскиот систем.
Владата на Германија донесе одлука за продолжување на доселувањето на неквалификувана работна сила од Западен Балкан до 2023 година, но воведе квота од 25.000 годишно.
Одлуката им овозможува на државјаните на Македонија, Србија, Црна Гора, Босна и Херцеговина, Албанија и Косово, независно од формалните квалификации за вработување, да допатуваат во Германија, објави Министерството за труд и социјална политика.
„Продолжувањето на правилото за Западен Балкан за три години е добро за германското стопанство. Одредени бранши, како што е градежништвото, и понатаму бележат експанзија и им требаат работници. Недостигот од стручен кадар не смее во овие бранши да го сопре растот“, изјави министерот Хубертус Хајл.
Тој додаде дека доаѓањето на квалификувана работна сила се овозможува ако нема доволно такви работници во Германија или во Европската унија.
Анализата на Институтот за истражување на пазарот покажува дека 58 проценти од работниците од Западен Балкан се на ниво на стручна квалификувана работна сила или повисоко.
Одлуката ќе стапи во сила од 1 јануари 2021 година.