Category Archives: Македонија

Македонија, Скопје

Секој понеделник наставата во училиштата во Аеродром ќе започнува со интонирање на државната химна (ВИДЕО)

Наставата во основните училиштa во Аеродром отсега секој понеделник ќе започнува со интонирање на македонската химна, затоа што почитта и љубовта кон татковината се градат од најмала возраст, напиша на својот фејсбук профил градоначалникот на Општина Аеродром Тимчо Муцунски.

-Наставата во основните училиштa во Аеродром отсега секој понеделник ќе започнува со интонирање на македонската химна, затоа што почитта и љубовта кон татковината се градат од најмала возраст.

Станува збор за иницијатива преку која изразуваме искрена почит кон татковината и со која имаме цел да го подигнеме националното чувство и љубовта на дечињата кон Македонија, но и ќе ги охрабриме да учат за македонската култура и традиција – напиша Муцунски.

https://fb.watch/ntsp_oAnRE/?mibextid=Nif5oz

Македонија

Негувателка во градинка во Велес им дала на децата да пробаат електронски цигари

Родители на неколку деца од градинката „Димче Мирчев“ од Велес тврдат дека негувателка во клонот Дворови им понудила на децата да пробаат од нејзината електронска цигара, а децата пробале од љубопитност.

Настанот се случил на 29 септември кога негувателката останала сама со групата деца во занимална и наводно им понудила да пробаат електронска цигара.

Директорката на градинката „Димче Мирчев“, Маја Велиновска за „А1он“ откри дека во моментов негувателката е суспендирана и се води дисциплинска постапка.

– Негувателката е суспендирана од работа и е покрената дисциплинска постапка. Се земаа изјави од родителите и децата. Според нивните искази, настанот е од 29 септември. Се случувало во занимална и децата велат дека пробале електронска цигара која им ја давала негувателката. Но, за сето требаше да се приберат докази и писмени изјави. Јас како директор преземав мерки според надлежностите и веднаш е отворена дисциплинска постапка кон неа и сите работи се во процедура да се расчисти случајот и тоа да се санкционира соодветно – истакна Велиновска за „А1он“.

Евентуална казнена мерка се носи отпосле, откако ќе се утврди што точно се случувало во занималната, а директорката истакна дека вработената направила поголем пропуст.

– Сметам дека сериозноста во една детска установа е голема и сметам дека треба да се повлече поголема одговорност за ова. Факт е дека нешто се случило и дека вработениот направил поголем пропуст, тоа е неминовно. Основна работа на згрижувачите во градинката е грижа за здравјето и безбедноста на сите деца, другото е споредна работа. А доколку ова се докаже дека е така, ова е сериозен прекршок кој не треба да помине така – рече директорката на градинката за „А1он“.

Освен што се собрани изјави од родителите и децата, одржан е и родителски состанок на кој е објасно што ќе преземе градинката преку дисциплинската постапка која е во тек.

Случајот го осуди и градоначалникот на Општина Велес, Марко Колев кој нема ингеренции во ОЈУДГ „Димче Мирчев“ откако министерката Јована Тренчевска му ги одзеде за наводно попречување на работата на градинките во Велес.

Македонија

Јанкулоска кажа дали би се сретнала со Никола Груевски

Поранешната министерка за внатрешни работи, Гордана Јанкулоска вечерва во „360 степени“ изјави дека во затворот додека ја издржува казната најмногу ѝ недостига семејството. 

Рече дека сопругот и синот три години ја посетуваат во затворот. Кажа дека со екс специјалната јавна обвинителка Катица Јанева се сретнуваат во затворот и се во коректни односи. 

Јанкулоска рече дека од сопартијците е блиска со екс министерот за транспорт и врски, Миле Јанкиески кој исто така е во затвор. 

„Јас не можам да одберам со кого, кога ќе се сретнам, затоа што се сретнувам само кога сум на домашно отсуство“, изјави Јанкулоска за средбата со претседателот на ВМРО-ДПМНЕ, Христијан Мицкоски. 

Таа рече дека тоа било можност да се информира за некои работи поврзани со политичките случувања кои не ѝ се јасни. Јанкулоска вели дека иако е во затвор, интересот за политичките случувања кај неа не се намалил. 

„Партијата не е еден човек и еден тим, партијата е идеја и ние со неа се идентификуваме“, вели екс министерката. 

Јанкулоска рече дека последната нејзина комуникација со екс премиерот Никола Груевски кој избега во Унгарија, била една недела пред тој да ја напушти Македонија. Вели дека таа нема проблем да се сретне со било кого, но не знае дали тој би сакал да се сретне со неа. 

Македонија

Македонска траги-комедија: Измените на Кривичниот законик го спасија и Ване Цветанов – се враќа во Македонија

Кривичниот законик го спаси и Ване Цветанов, кој беше осомничен за злоупотреба на службената положба и овластување бидејќи заедно со неговата невенчана сопруга со државни пари оделе на службени патувања.

По околу десет месеци поминати во Германија како азилант, Ване Цветанов се враќа во Македонија. Поранешниот претседател на Советот за унапредување и надзор на ревизијата на својот официјален профил на Фејсбук објави заедничка фотографија со неговата сестра и зет, и им се заблагодари на поддршката која му ја пружиле за време на неговото азилантско патешествие во Германија.

-Благодарение на измените на Кривичниот законик, опасноста од притвори повеќе не постои, па за еден месец се враќам во Македонија – објави Цветанов.

Цветанов се товареше дека дека вршел незаконски јавни набавки и ја ангажирал поранешната невенчаната сопруга Дунавка Трифуновска и со државни пари оделе на заеднички службени патувања, односно за злоупотреба на службена положба и овластување, со што го оштетил државниот буџет за 75.000 евра.

Македонија

Д-р. Беќаровски објави шокантна порака од починатото 24-годишно момче: ЗОШТО СЕ ПРИКРИВААТ ОВИЕ ФАКТИ?!

Доктор Нико Беќаровски на Фејсбук објави порака за која вели дека му пристигнала нему лично, а е поврзана со смртта на 24-годишно момче кое почина завчера во битолската болница. Пораката, пишува Беќаровски, ја објаснува причината за сепсата и подоцнежниот развој на иреверзибилната дисеминирана интраваскуларна коагулација. Според докторот, грешката воопшто не е кај дежурните лекари и колегите од битолските интерни одделенија.

Пораката е од наводен роднина на момчето, кој вели дека семејството се сомнева поради што дошло до тој голем инфект кај момчето.

Почитуван докторе, мене детето што почина ми е близок роднина, би сакала да ви кажам како дојде до тој ГОЛЕМ ИНФЕКТ на што ние се сомневаме. Имено детето по кое сега ни гори душата пред три недели имаше мал хирушки, ако можам да го наречам зафат, не знам ни како да го наречам или интервенција на Ортопедија бидејќи во јуни месец се повреди со некоја сајла по грбот и имаше рана за која не отиде на лекар бидејќи изгледаше површинска исекотина. Пред неполни три недели детето во туширање со допир осетил дека нешто има на повреденото место како некое страно тело кое не го боли само на допир се осеќа. Во истиот момент оти на болница го упатуваат на ортопедија му објаснува таму за случајот и тие му велат сега е касно дојди утре ќе направиме ренген и ќе видиме што имаш. Другиот ден детето оди таму прави ренген и на него се гледа метален предмет, односо беше парче железо. Му го вадат железото одма и го прашува докторот кога имас последен пат ставено тетанус? Тој му одговара ревакцинација на 18 години. Докторот му вели добро ко така нека потреба од нова доза и на толку длабока рана не го шие само му вели ела другиот ден на преврска другиот ден оди ама нема кој да го види нема доктор само сестрата го преврзува и тое е тое. Е тука јас се сомневам тука е лекарската греска, се вели во пораката.

Македонија

Затвореник во Идризово им зел 4000 евра на полициски командири, им ветувал дека ќе ги вработи во МВР

Управата за извршување на санкции на извршила вонреден наздор во казнено-поправниот дом „Идризово“, по поплаки од двајца командири, кои се пожалиле од двајца затворски полицајци дека им се заканувале, а кои полицајци пак, пријавиле дека му дале мито на едниот затвореник, а тој ветувањето не го реализирал, пренесува СДК.мк

Затворениците Тони Денковски и Јанко Јаневски тврделе дека од затворските полицајци се под закани по живот, рекет и уцени. Двете службени лица признале дека платиле мито од 4.000 евра за да бидат преместени на работа во МВР, но не дека се заканувале поради неисполнување на ветеното.

Службените лица од Управата разговарале и со осуденото лице Јанко Јаневски кој тврдел дека никогаш не зел пари од припадници на затворската полиција, туку напротив, дека лично тој му давал пари на Киро Димов, припадник на затворската полиција. Осудениот Јаневски парите ги добивал од спортско обложување кое се организирало во установата и на неколку наврати му позајмувал пари на Димов. Потоа почнал да му се заканува преку осудени лица за враќање на долгот во рок од 24 часа.

За наводите дека припадникот на затворската полиција земал пари од Јаневски, потврдиле и две други осудени лица.

Целата вест на СДК.мк

Македонија, Хуманост

ДА МУ ПОМОГНЕМЕ НА АЛЕКСЕЈ!

Алексеј има само 3 години и му е дијагностицирана хипоксична енцефалопатија, ретка болест која означува недостаток на кислород во мозокот, создавајќи ризик од сериозни последици и смрт.


Решението за оваа болест е пресадување на матични клетки, нешто што за жал не е возможно во нашите здравствени институции.


Поради тоа, неговото лечење мора да продолжи во болницата Лив Хоспитал Улус во Истанбул, но пресадувањето чини 19.000 евра, средства кои моментално семејството на Алексеј ги нема.


Затоа ве замолуваме токму вас, хумани луѓе кои ја поддржувате работата на нашата фондација, уште еднаш заедно да ја покажеме солидарноста на дело и да донираме за да го спасиме животот на нашиот Алексеј!


Донациите ќе се прибираат на сметката на фондацијата, а со собраниот износ ќе се платат сите трошоци кон болницата во Турција.

Линк за донирање: https://gofund.me/27ad16be

Македонија

Осветен манастирот на Тоше „Свето Преображение Господово“ (Фото)

– Манастирот „Свето Преображение Господово“ во Крушево, во чија изградба придонесе и Тоше Проески, денеска е осветен во присуство на голем број верници.

Чинот на осветување го изврши архиепископот охридски и македонски г.г. Стефан, во сослужение на архијереи на Македонската православна црква – Охридска архиепископија.

На осветувањето на манастирот присуствуваше и министерот за внатрешни работи Оливер Спасовски кој на својот фејсбук-профил објави дека со новиот фрескоживопис поставен неодамна, овој манастир кој, како што напиша „Тоше го нарекуваше втор дом поради духовниот мир кој го пронаоѓаше во него“, конечно го добива својот целосен манастирски сјај.

-По долги години, денеска се исполнува една света обврска, големата желба на нашиот Тоше Проески и на крушевчани – се осветува манастирот „Свето Преображение Господово“ во Крушево, за чија изградба Тоше несебично се залагаше уште од раното детство, па се до последниот ден од кобната несреќа, по која македонскиот народ остана во длабок непребол. Нека му е вечна слава на нашиот Тоше!, напиша Спасовски на Фејсбук.

Македонија

Медицинската сестра што крадеше цитостатици од Онкологија па избега во Германија – доби обвинение за проневера во службата

Поднесено е обвинение против младата медицинска сестра од Клиниката за Онкологија А.О. која во два наврати крадеше цитостатици, еднаш во 2020 и вторпат во 2023 година.

Осомничената не се јавила на распит и не е достапна на органите на прогонот. Според информации на Слободен печат, таа избегала во Германија. Потерница не е распишана туку ќе ѝсе суди во отсуство а доколку биде осудена ќе биде распишана потерница. ЈО против неа поднесе два обвинителни предлози за кривични дела проневера во службата од член 354 од Кривичниот Законик.

„Во текот на кривичната постапка обвинителството обезбеди докази дека обвинетата со намера да прибави противправна имотна корист за себе присвоила поголем број ампули со различна намена во вкупна вредност од 59.760 денари кои ѝ биле доверени во службата. Ампулите ги изнесувала од работното место а потоа ги оставала во автомобил со намера да ги предаде на друго лице“, велат од Обвинителството.

Сестрата не го открила идентитетот на лицето или лицата на кого ги предавала ампулите.

Македонија

Илиноис го прогласи септември за месец на македонското наследство

Гувернерот на Илиноис Џеј Би Рицкер го прогласи септември 2023 за месец на македонско-американското наследство.

Ова, како што пренесува Гласот на Америка на македонски, е најнова прокламација од серија известувања за славење на македонската култура во САД овој месец, меѓу кои од градоначалникот на Чикаго Брендон Џонсон и од гувернерката на сојузната држава Мичиген Гречен Витмер.

-Илиноис е дом на многу македонски Американци кои придонесуваат културно, економски и филантропски, се вели во известувањето.

Во него пишува дека „бројни вредни македонски имигранти помогнаа да се одржи американскиот претприемачки дух и се дел од историјата и културата на Чикаго“.

Гувернерот наведе и успешни македонски Американци со бизнис во Чикаго, меѓу кои бизнисменот Мајк Зафировски, поранешен извршен директор на „Моторола“ и „Нортел“, Дино Делевски, основач и тренер на младинската фудбалска организација „Чикаго Инферно“, и повеќе други.

Градоначалникот на Њујорк Ерик Адамс, пак, ја прогласи минатата сабота, 16 септември, за ден на македонското наследство, кога македонското знаме се крена на Вол Стрит по повод 32 години независност, објави Гласот на Америка на македонски.

Во јули републиканскиот сенатор од Индијана Мајк Брон, претстави резолуција во Сенатот да се прогласи септември 2023 година за месец на македонско-американско наследство во САД, кога ќе се слават јазикот, историјата и културата на македонските Американци.

Резолуцијата спонзорирана од Брон, кој е единствен сенатор што е член на групата пријатели на Македонија и македонските Американци во Конгресот, прво треба да биде одобрена од сенатскиот комитет за судство, пред за неа да гласа целиот Сенат.

Гласот на Америка на македонски ja контактираше канцеларијата на сенаторот Брон за статусот на оваа резолуција во моментов, но оттаму се` уште нема одговор.

Овие резолуции и прокламации се на барање на Обединетата македонска дијаспора (ОМД).