Во Хрватска, од јануари следната година, ќе започне правната процедура за повторно воведување на задолжителното служење на воениот рок. Според Министерството за одбрана, оваа иницијатива доаѓа по претседателските избори, а првите повици за воени обврзници се очекуваат во текот на летото 2025 година.

Задолжителното служење на воениот рок беше привремено укинато во 2008 година, а од тогаш обуката беше организирана исклучиво на доброволна основа. Сепак, Министерството за одбрана сега изготви законски предлози кои ја регулираат основната воена обука и другите аспекти поврзани со спроведувањето на воениот рок. Според изјавата пренесена од ХРТ, овие предлози се веќе подготвени и чекаат да бидат разгледани и усвоени.

Министерот за одбрана Иван Анушиќ изјави дека новите воени обврзници ќе бидат сместени на три главни локации. Тој додаде дека околу 17.000 до 18.000 млади мажи секоја година стануваат полнолетни и би можеле да бидат потенцијални кандидати за основната воена обука. Воениот рок, според него, ќе се фокусира на развој на основните воени вештини и ќе обезбеди стабилна основа за националната безбедност.

Претседателот на Хрватска, Зоран Милановиќ, кој е и врховен командант на вооружените сили, не се спротивставува на воведувањето на задолжителниот воен рок. Сепак, тој повика на поширока дискусија на оваа тема и предложи прашањето да биде разгледано на седница на Советот за одбрана.

Иницијативата за враќање на задолжителниот воен рок не е изолирана. Во соседна Србија, исто така, се планира повторно воведување на задолжителната воена служба во 2025 година. Србија го укина задолжителното служење на воениот рок на 1 јануари 2011 година, но сега се подготвува за негово враќање со цел зајакнување на националната безбедност.

Со оваа одлука, Хрватска се приклучува на групата европски земји кои во последните години се враќаат на задолжителниот воен рок, гледајќи го како неопходен чекор за зајакнување на одбранбените капацитети и подготвеноста на младите генерации.

Извесно е дека после празниците во Собранието ќе биде покрената постапка за интерпелација на членовите на Судскиот совет кои се избрани од пратениците. Премиерот Христијан Мицкоски денеска рече дека размислуваат за такви активности за следниот месец.

– Ние размислуваме за неколку потези, некои мерки кои ќе ги преземеме после празниците, затоа што и покрај најавите дека се надминати оние појави на анксиозност, дијареа, грчеви и покачена температура, сè уште траат тие процеси траат кај одредени обвинители и судии. Граѓаните мора да ја добијат правдата. Планираме вакви активности во следниот период – рече премиерот Мицкоски, одговарајќи на новинарско прашање дали се планира разрешување на оние членови на Судскиот совет кои се избрани од Собранието.

За правдата, додаде премиерот, не се доволни само полициските акции.

– Тоа беа историски, досега незапаметени акции, кои ги направија МВР, СВР Скопје, БЈБ и АНБ. Но, не одат работите во правецот што го очекуваат граѓаните. Ние како Влада ќе се бориме против криминалот и корупцијата преку МВР, но очекуваме целата состојба да биде комплетна откако и другите институции ќе разберат дека граѓаните мора да ја добијат правдата и дека правдата за сите ќе биде подеднаква – рече денеска премиерот.

Собранието не го усвои извештајот за работењето на Судскиот совет за 2023 година, па според одредени толкувања тоа може да биде основ за разрешување на оние членови на Советот кои се избрани од пратениците. 

Тоа се членовите кои во Законот за Судскиот совет се дефинирани со терминот „истакнати правници“. Моментно, како истакнати правници во Советот членуваат Весна Дамева, која неодамна поднесе оставка од функцијата претседател, Павлина Црвенковска, Селим Адеми, Миљазим Мустафа и Тања Чачарова Илиевска.

Судскиот совет има вкупно 15 члена. Освен правниците, членуваат 8 судии кои се избираат на непосредни судски избори, а членови по функција се министерот за правда и претседателот на Врховниот суд.

Од петмината правници, тројца ги избира директно Собранието, а останатите двајца ги предлага претседателот на државата, а ги избира Собранието.

Најновата неофицијална вест е дека поранешниот вицепремиер, Артан Груби, осомничен во случајот „Лотарија“, престојува во Албанија, во близина на Драч, во месноста Хамалај, позната по прекрасни песочни плажи и приватност.

Информациите во медиумите за локацијата на Груби протече од членови на Владата и одредени институции кои имаат неофицијални информации дека Груби престојува покрај Јадранско море.

Претходно, вицепремиерот Изет Меџити, во интервју за албанската „Ора њуз“ рече дека и, според неговите информации, Груби не е повеќе во Косово, туку во Албанија.

„Со бегството тој ја докажа вината и затоа побегнал од државата. Мислам дека денес, утре или задутре, тој еден ден ќе се соочи со правдата“, рече Меџити.

Бизнисменот и почесен конзул на Косово, Арсим Папранику, во полиција дал исказ дека на 15 декември го одвезол поранешниот вицепремиер Артан Груби до Тирана, каде пиеле кафе и го оставил во хотел близу стадионот, пишува „Фокус“повикувајќи се на полициски извори и извори од владата.

За поранешниот вицепремиер Груби, кој е осомничен за проневера од 8 милиони евра во Државна лотарија, премиерот Христијан Мицкоски рече дека не сака да шпекулира дали побегнал во Албанија или во Косово.

„Факт е дека не бил „чист како солза“, бидејќи ако бил, немало потреба да биде бегалец од правдата – ќе дојде тука и ќе ја брани својата невиност“, рече Мицкоски, кој смета дека тој не е политички бегалец, туку бегалец од правдата и затоа очекува да не добие азил во странство.

Груби, на 15 декември, замина од Македонија преку граничниот премин „Блаце“ за Косово. Иако беше ставен на „стоп-листа“ по наредба од јавен обвинител, беше пропушен од полициијата. Тој беше во друштво на бизнисменот и почесен конзул на Косово, Арсим Папранику. Внатрешната контрола при МВР утврди дека полицискиот службеник ги завел Груби и Папранику дека пешки ја минале границата, не го евидентирал возилото и не почекал системот да јави дали има активна мерка.

Од СДСМ обвинија дека, ВМРО-ДПМНЕ го пушти Груби да избега и атоа сметаат дека одговорноста за бегството е целосно кај нив и МВР.

Извор: Нетпрес