Холандија по вторпат за две години ѝ зема скалп на Македонија на еден голем ракометен собир. Но, синоќа во Вараждин беше далеку понеизвесно и повозбудливо за разлика од средбата во Краков, а тензиите од теренот се пресликаа и на трибините од каде имаше огромно незадоволство поради бројните контроверзни одлуки на судиската двојка од Данска.

По средбата во Вараждин, вардарецот Ларс Кој, на домашната јавност ѝ објаснал за страста и љубовта на македонските фанови кон ракометот и репрезентацијата.

„Тоа е сосема поинаков свет и култура. Сè што прават, прават со голема страст, дури и во некои разговори ќе помислите дека се бесни едни на други, но тоа е сосема нормално за нив. Можам да кажам дека се отворени и пријателски луѓе, но во спортот, секогаш сè е прашање на живот или смрт. Ако победиш си Господ, но по секој пораз си никој и ништо. Нe им го разбирам јазикот и не знам што викаат, но можам да кажам дека се фрла со најразлични предмети кон играчите. Во Македонија атмосферата е фантастична, игравме дерби во Скопје пред 4.000 навивачи, тоа беше специјално, прекрасно искуство“, рече Кој за холандски „Телеграф“.

На средбата со Македонија кружниот напаѓач на Вардар постигна четири гола.

Македонскиот ракометен репрезентативец Томислав Јагуриновски потенцира дека нашите репрезентативци прикажа храбро издание, но на крајот успеаја да извлечат позитивен резултат.

„Ова беше еден многу тежок натпревар за играње, квалитетен. Противникот е брза и квалитетна репрезентација. Не знам што беше пресудно… мечот беше таков како што беше, тие беа подобри на крај, иако имавме шанса да се вратиме.

Ни следи Гвинеја, ќе имаме ист пристап, мора да го добиеме тој дуел за да продолжиме понатаму во следната фаза“, рече Јагуриновски.

Ракометната федерација на Македонија ќе поднесе жалба за судењето на натпреварот меѓу Македонија и  Холандија од страна на данската судиска двојка Мадс Хансен и Јеспер Мадсен.

Информацијата ја сподели Генералниот секретар на РФМ, Филип Милошевски, кој истакна дека федерацијата ќе реагира на судењето кое било некореткно.

„Досега ретко сме се жалеле, можеби двапати досега, ама ова беше под секое спортско достоинство. РФМ ќе поднесе жалба, а без разлика на исходот, Македонија победи“, потенцира Милошевски.

На натпреварот Холандија доби 12 пенали, имаше доста спорни моменти, а Македонија заврши и со двојно повеќе исклучувања и два црвени картони.