Територијата на државата и во текот на наредната седмица ќе остане под влијание на силен антициклон и релативно топла воздушна маса од јужните предели, што ќе услови значително повисоки температури од вообичаените за овој период од годината. Според проценките на Метеоаларм, дневните температури ќе бидат за околу, а на места и над 10 степени повисоки од просекот, со максимум кој локално ќе достигне речиси 20 степени.

Иако деновите ќе бидат невообичаено топли, утринските часови ќе останат постудени, со минимални температури околу или неколку степени под нулата.

Стабилната атмосфера, слаб ветер и висок воздушен притисок ќе создадат услови за појава на магла и ниска облачност во котлините. На поединечни места маглата ќе биде густа и ќе се задржува во текот на целиот ден, што локално ќе резултира со пониски дневни температури. Скопската котлина исто така ќе биде подложна на чести магливи периоди, особено наутро и навечер.

Според актуелните метеоролошки модели, барем до 20 декември нема изгледи за зимски услови ниту за појава на снег, па така зимското време засега се одложува.

Во изминатите 24 часа земјата беше зафатена од влажен бран од југ кој донесе дожд низ сите региони, најмногу во западните и јужните подрачја. На планините над 1700–1800 метри дождот преминуваше во снег. Најголеми количини дожд се измерени во Маврово, каде до утринава во 7 часот се регистрирани 30 литри на метар квадратен.

Утрово на граничните премини „Табановце“ и „Дојран“ се бележат значителни задржувања за излез од државата. Според информациите на АМСМ, на „Табановце“ се чека околу 40 минути, а на „Дојран“ околу 30 минути. На останатите премини нема подолги чекања.

Сообраќајот на државните патишта се одвива непречено, но коловозите на одредени места се влажни. Интензитетот на движење е умерен.

Намалена видливост поради густа магла утринава има на патниот правец Гајре – Попова Шапка, каде видливоста се движи меѓу 30 и 40 метри, како и на планинскиот премин Пресека, со видливост од 100 до 150 метри.

АМСМ апелира до возачите да ја прилагодат брзината, да ја почитуваат сообраќајната сигнализација и да управуваат внимателно, особено во клисурите, котлините и речните долини каде постои ризик од одрони. Најкритични делници се Катланово – Велес, Маврово – Дебар – Струга, Виница – Берово и Кочани – Делчево.

Националниот парк Шар Планина и официјално стана полноправна членка на Мрежата Паркови на Динаридите, платформа што обединува 105 заштитени планински региони од осум држави. Членството беше потврдено на VII Меѓународна конференција на Парковите на Динаридите – „Глобални и европски перспективи на заштитените подрачја во регионот“, која се одржа во Подгорица.

Претставниците на НП Шар Планина потенцираат дека членството претставува значајно признание и поттик за понатамошен развој на заштитеното подрачје.

„Особено го истакнувам тоа што со колегите од соседните држави разменивме искуства, што говоревме за добрите и лошите моменти во управувањето со заштитените подрачја“, изјави Милорад Андријески од управата на паркот.

На конференцијата, на која присуствуваа повеќе од 110 учесници од земјите од Динарскиот лак, како и од Италија, Белгија, Франција, Шпанија и Чешка, беше прифатено и зачленувањето на Паркот на природа Драгишница и Комарница од Црна Гора.

Управувачите на заштитените зони ја нагласија потребата од посилен регионален пристап во обновата на природата, подобрување на управувањето со мрежата Натура 2000, редовно оценување на ефикасноста на заштитата и интензивна меѓусебна соработка.

Во рамки на тридневната програма беа одржани четири панел-сесии, две работилници, како и седници на Управниот одбор и Собранието на Мрежата на Парковите на Динаридите.