Украинскиот претседател Володимир Зеленски изјави дека САД треба да ја убеди Русија да прифати 30-дневен прекин на огнот, како што беше предложено за време на украинско-американските преговори во Саудиска Арабија.

„САД треба да ја убедат Русија да го направи тоа“, рече Зеленски во своето дневно обраќање на социјалните мрежи, додавајќи дека Украина позитивно го гледа предлогот за примирје.

Тој им се заблагодари на американскиот тим за конструктивните разговори во Саудиска Арабија.

Украинскиот претседател рече дека предлогот за прекин на огнот од 30 дена ги покрива сите фронтови, а не само воздухот и морето.

„Американската страна ги разбира нашите аргументи, ги прифаќа нашите предлози и сакам да му се заблагодарам на претседателот Трамп за конструктивноста на разговорите помеѓу нашите тимови“, изјави тој на Телеграм.

Зеленски потврди дека Украина го прифатила предлогот за прекин на огнот, додавајќи дека е „спремен да го направи тој чекор“.

„Украина е подготвена за мир. Русија мора да покаже дали е подготвена да ја заврши војната или сака да ја продолжи“, додаде Зеленски.

Потсетуваме, по состанокот во Џеда, претставниците на украинската и американската делегација издадоа заедничко соопштение.

„САД веднаш ќе ја укинат паузата за размената на разузнавачки информации и ќе ја продолжат својата безбедносна помош за Украина“, беше соопштено.

Двете земји, според американскиот Стејт департмент, направија „важни чекори кон обнова на траен мир“ за Украина.

Исто така, тие се согласија да склучат договор за развој на критични рударски ресурси на Украина.

Американскиот претседател Доналд Трамп купи автомобил „Тесла“, што може да се заклучи од неговата објава на социјалната мрежа. Трамп објави видео на кое се гледа како влегува во црвен „Тесла“ пред Белата куќа.

„Ох, прекрасно е. Леле“, вели Трамп додека влегува во автомобилот. Тој додаде дека не му е дозволено да вози бидејќи долго време не е зад воланот: „Не ми е дозволено да возам, можеш ли да веруваш? Сакам да возам автомобили, но не ми е дозволено“.

Трамп сподели дека ќе го има автомобилот во Белата куќа и ќе му дозволи на персоналот да го користи.

При предавањето на автомобилот, извршниот директор на „Тесла“, Илон Маск, изјави дека компанијата планира да го удвои производството на возила во САД во следните две години, што ќе биде резултат на „големите политики на претседателот Трамп“.

Трамп додаде дека купува нов автомобил „Тесла“ за да му покаже поддршка на Маск поради неодамнешните протести и падот на цената на акциите на компанијата.

Погледнете го видеото

Иако претседателот Доналд Трамп одложи голем дел – но не и сите – од царините што ги воведе за Канада и Мексико, тоа не ги спречи северните соседи на Америка да одговорат со одмазднички мерки.

Премиерот на канадската држава Онтарио, Даг Форд, на прес-конференција изјави дека ќе воведе дополнителна такса од 25% на извозот на електрична енергија кон три американски држави почнувајќи од понеделник, предупредувајќи дека Канада целосно ќе го прекине снабдувањето со струја ако САД воведат нови царини на канадските производи.

„Ако САД претераат, нема да се двоумам целосно да ја исклучам струјата“, изјави Форд. „Верувајте ми, не сакам да го направам ова. Се чувствувам ужасно за американскиот народ, затоа што не се тие виновни за овој трговски конфликт. Одговорна е една личност – претседателот Трамп.“

Форд истакна дека новата такса ќе ги чини американските семејства и бизниси во Њујорк, Минесота и Мичиген дополнителни 100 долари месечно на нивните сметки.

Но, овој потег би можел да ѝ наштети и на канадската енергетска индустрија. Канада, која е многу позависна од американскиот извоз отколку што САД зависат од канадската стока, ризикува да западне во рецесија доколку трговската војна ескалира.

Форд предупреди дека би можел дополнително да го зголеми надоместокот од 25% ако американските царини продолжат да растат. Трамп, пак, се закани дека ќе воведе царини за канадските млечни производи и дрвенарија, воспоставувајќи принцип на реципрочни мерки – долар за долар.