Вчерашниот ден 28-ми ноември албанскиот народ го одбележува Денот на албанското знаме. Меѓутоа, иако не е државен празник, ниту, пак, празник на малцинските заедници, од утрото вчера особено во Полошкиот регион беше забележливо огромното присуство на албански знамиња, но такви со карта на „голема Албанија“. Долги години јавноста го поставуваше прашањето со знаме на друга држава без националното македонското до него не се крши законот за знамиња.

Меѓутоа, поради коалициските калкулации изминатите години реакција од позиција на власт и држава редовно изостанувше, , барем онаква каква што би требало да биде според законот, гледајќи на тоа како на бенигни и изолирани инциденти. А тоа, сосема разбирливи, од некои е сфаќано како премолчување на провокативните инциденти со јасен етнички предзнак.

Но, вчерашниот 28-ми ноември и инцидентите за кои реагира со право огромниот дел од македонската јавност „се случи“ откако ДУИ по речиси две децении замина во опозиција. И тука, се во право првите и донеодамнешните нивни коалициски партнери од СДСМ, кои критикуваат „потфрлање во превенцијата на скандалозните настани“. Требаше да се очекува, патем тоа на извесен начин беше и најавувано,  дека „интегративците“ на Али Ахмети ќе се обидат да предизвикаат радикализирање на состојбата во која повторно ќе се самонаметнуваат како фактор на меѓуетничка стабилност.

Во тој излитен манир на „заштитници“ на албанскиот народ и „миротворци“ од ДУИ ден по скандалозното „прославување“ ќе се огласат со тврдењето дека „интервенцијата на полициската за време на прославата на Денот на албанското знаме била причина за инцидентот“ . Според партијата, полицијата „предизвикала непотребни тензии и создала клима на конфронтација, нарушувајќи го правото на граѓаните слободно да ја одбележат оваа значајна празнична традиција“. Од ДУИ велат дека го осудуваат индивидуалниот чин на палење на државното знаме, нагласувајќи дека таквите дела не ги одразуваат вредностите на Албанците и не се во согласност со стремежите за стабилен соживот и заемна почит.

Но мора да се истакне, за разлика од минатите години кога вакви „славења“ на албанското знаме беа ограничени во средините во кои албанската популација е мнозинска, вчера имавме низа примери на провокации со возила кои демонстративно и провокативно парадираат накитени со албански знамиња и вклучени сирени, токму во средините каде што албанското население и речиси воопшто не е застапено и особено забележливо. И токму во периодот на најголемиот сообраќаен метеж. За среќа, тоа мина без посериозни инциденти на конфронтираност но со срамен навредувачки однос на сожителите, па и кон самите себеси, со уништувањето на знамето на македонската држава.

Па се наметнува прашањето дали ДУИ сака да ја убеди јавноста дека вчера бевме сведоци на изливи на самоорганизирана „масовна прослава“, откако од нивното заминување во опозиција без исклучок секојдневно се обидуваат во своите објави да го протнат наративот за наводните штети што ги трпеле граѓаните од албанско потекло откако тие не се на власт. Според сѐ судејќи, се чини дека станува збор очајнички однапред испланиран обид да се предизвика причина за инцидент и дестабилизација на земјата, а на што од актуелните владејачки структури повеќепати изминатиот период беше предупредувано.  Едноставно затоа што „интегративците“ на Ахмети веќе се свесни дека по дводецениското владеење, албанските гласачи во Македонија веќе не ѝ даваат масовна поддршка на ДУИ, партијата критикувана од своето членство за непотизам и махинации се ситни и дели, и сѐ подалечно изгледа враќањето на власт, особено во скор период.

Покрај тоа, секојдневните средби и инсистирање на челниците на ДУИ кај странските дипломати во земјата очигледно не се ефектуираат со враќање на моќта на Ахмети и неговото опкружување. Напротив, поверојатно е дека „интегративците“ се советувани да останат на сегашните позиции, оптоварени со багажот на сомненија и обвиненија за големи финансиски малверзации. Во таков контекст, на ДУИ навистина не би му останало ништо друго освен да се надева дека во услови на една крајно радикализирана атмосфера може да биде некако уважена како фактор. И, се разбира, воопшто не треба да има сомневања дека партијата на Ахмети веќе ги загубила своите организаторски потенцијали и поддршка. Особено во манипулирањето со екстреми и инсценирањето или едноставно предизвикувањето инциденти, во прв ред, на меѓуетничка основа. Оттаму, јавноста не може се оттргне од перцепцијата дека вчерашните инциденти и провокации се оркестрирани, и дека зад тоа стои ракописот на ДУИ.

Како и да е, македонското знаме вчера беше сквернавено, а албанското злоупотребено и посрамено – наместо да биде чествувано достоинствено – стана инструмент за провоцирање инциденти и остварување лични политички амбиции.

Вообичаено, по синоќешните жестоки реакции на граѓаните преку социјалните мрежи, денеска следуваат и партиските реакции со осуди и очекуваното префрлање на вината на релацијата власт – опозиција. И обвинителите се огласија со најава дека ќе го расчистуваат случајот со уништувањето на државното знаме. Меѓутоа, останува фактот дека станува збор за ситуација којашто е режирана со јасна политичка цел, без грижа за тоа дека на крајот сите ја плаќаме цената за тоа.

Извор: Нетпрес

По досега невидената прослава на 28 ноември, додека албанската песна и оро одекнуваа низ целата земја, очигледно оваа празнична атмосфера не им одговараше на оние на кои им се наруши комфорот на фотелјите на власта. На крајот на денот се појавија овие кругови кои сакаат да ја дестабилизираат државата. Не затоа што ја сакаат државата, туку затоа што им недостига власта, соопштија од коалицијата Влен.

„Коалицијата ВЛЕН најостро ги осудува овие неприфатливи дела што се случија синоќа за време на Денот на независноста на Албанија, каде срамно беа запалени државните знамиња, слики кои денеска беа објавени во јавноста од медиумите.“

Повикуваме на разумност и меѓусебно почитување, бидејќи палењето на знаме е подгревање на меѓуетничките односи во оваа земја. А, оваа работа не им служи ниту на оние кои ја поттикнуваат, односно на никој друг, а уште помалку на граѓаните.

Чувствуваме одговорност и апелираме до сите граѓани да покажат разумност и решителност да не станат плен на злонамерни провокации. Не дозволувајте да бидете жртва на никого, а уште помалку од оние кои не ги слушнале или виделе вашите маки. Веруваме во високата свест на нашите граѓани кои ќе бидат будни и нема да бидат инструментализирани од оние кои по губењето на власта го изгубија патот во сопствениот двор.

Се грижиме за безбедноста на нашите граѓани, за стабилноста на државата, затоа предупредуваме на максимална внимателност на сите граѓани без разлика, да не прават дела од кои никој не може да избега. И за ова имаме доволно докази од минатото.

Мултиетничкиот карактер на Македонија е вредност на нашата држава и општество, а секој што ќе се обиде да ги наруши меѓуетничките односи покажувајќи непочитување кон другите, особено кога се палат државните знамиња, ќе мора да се соочи со надлежните органи за спроведување на законот и да бидe повикан на одговорност.

Ваквите празници симболизираат толеранција и меѓусебно разбирање, затоа вчера албанските граѓани славеа на најдобар можен начин, во училиштата, плоштадите и во главниот град, со знамиња завиткани околу вратот и насекаде со насмевки.

Коалицијата ВЛЕН е целосно посветена на стабилност и напредок без никаков компромис!“ се вели во реакцијата.

На денешната прес-конференција, министерот за внатрешни работи, Панче Тошовски, остро реагираше на вчерашните настани кои, според него, биле насочени против македонските граѓани и државата. Тој нагласи дека делувањето на поединечни групи кои предизвикуваат тензии е недозволено и го загрозува стабилноста на Македонија.

„МВР одговори брзо и одлучно на сите кривично-правни настани кои се случија вчера. Сакам да го пофалам одговорот на МВР на предизвиците насочени кон македонските граѓани. Полицијата ќе продолжи со постапки и во наредните денови, сè додека не се утврди сета одговорност,“ изјави Тошовски.

Во текот на вчерашната вечер, беа уапсени 8 лица. Четири лица се уапсени поради учество во тепачка, додека други 4 лица се уапсени поради основано сомнение дека сториле кривично дело кое се однесува на предизвикување национална и верска омраза, со предвидена казна затвор од 1 година. Едно од лицата е малолетник, а останатите се полнолетни. Станува збор за млади лица кои извршиле кривични дела во текот на вчерашниот ден. Тие се приведени и се наоѓаат во полициска станица и ќе бидат изнесени пред суд.

Тошковски упати и порака до сите оние кои сакаат да предизвикаат дестабилизација на државата, нагласувајќи дека на таквите обиди ќе се одговори жестоко.

„Сакам да упатам порака до сите кои имаат намера да предизвикаат дестабилизација на Македонија: ќе одговориме жестоко и сурово на било какви обиди и ќе се соочиме со сите предизвици. Полицијата реагира соодветно на сите предизвици. Времето на пајакот заврши, сите имаат име и презиме, и сите ќе одговараат“, додаде Тошковски.

Министерот исто така апелираше до јавноста, повикувајќи ги оние кои имаат информации или докази во врска со настаните од вчерашниот ден да ги достават до МВР. Дополнително, тој испрати апел на разум и зрелост до сите граѓани, со порака да не се дозволи подгревање на меѓуетнички тензии од ниту една националност во Македонија.