Лукашенко: „Белорусија нема што да бара во ЕУ – иднината е во евроазиската соработка“.

Претседателот на Белорусија, Александар Лукашенко, денеска изјави дека неговата земја нема никаква перспектива во Европската унија и нагласи дека Белорусите се национално свесни луѓе кои длабоко ја сакаат својата татковина.

Во изјава дадена пред новинари, Лукашенко го коментираше процесот на пристапување на Украина во Европската унија, оценувајќи го како скапа и нереална авантура.

„Во овој процес се вклучени многу функционери, се вртат милиони долари, а шансите Украина некогаш да стане дел од ЕУ се минимални. Луѓето таму само ги трошат европските грантови, а ништо реално не се случува“, рече белорускиот лидер, пренесе државната агенција БЕЛТА.

Лукашенко ја оцени Европската унија како централизирана политичка и економска структура каде што земјите-членки го губат својот национален и економски идентитет.

„Погледнете ја Словачка, погледнете ја Унгарија – сфатија дека ја губат својата суштина. Прво го изгубија идентитетот, а потоа и економијата. Повеќе не можеа да произведуваат самостојно“, рече Лукашенко.

Говорејќи за Украина, Лукашенко го нарече украинскиот претседател Володимир Зеленски „добар човек, но не и доволно искусен“. Притоа му порача дека во ситуации каде што недостига разбирање, треба да се слушаат поискусните.

Тој потсети и на проблемите што Украина ги имаше со извозот на жито преку ЕУ, алудирајќи на ситуацијата кога земјите-членки, како Полска, не дозволија транспортот на украинско жито за извоз во Африка, каде што владееше недостиг.

„Затоа и велам – Украина нема што да бара во Европската унија. Пазарите одамна се поделени, и нивната вистинска шанса е тука, во нашиот регион“, нагласи Лукашенко.

Според него, Украина заедно со Белорусија, Русија и Казахстан имала солидна основа за развој преку евроазиска соработка, но целата идеја била напуштена по, како што вели, „наметнувањето на националистичка идеологија“, што според него довело до сегашниот конфликт.

„Ќе ja завршиме овaa војна – имаше премногу жртви. Но, ако во меѓувреме и економијата пропадне, Украина ќе исчезне. Затоа, пред да побегнете во ЕУ, размислете – дали навистина им требате, и ако да – во каква состојба? Ќе бидете земја без индустрија, без земјоделство, без она со што некогаш се гордеевте“, заклучи Лукашенко.

Трамп: Преговорите меѓу Украина и Русија можеби одат во добра насока.

Американскиот претседател Доналд Трамп изјави дека преговорите околу решавањето на конфликтот во Украина „можеби се одвиваат добро“, оставајќи отворена можност за нови дипломатски поместувања.

Изјавата ја даде синоќа, на прес-конференција во претседателскиот авион, пренесе Ројтерс.

„Мислам дека сè оди добро меѓу Украина и Русија. Ќе видиме што ќе се случи, но мислам дека работите се одвиваат добро“, рече Трамп, оставајќи простор за оптимизам.

Истовремено, тој потврди дека наскоро може да има нови информации во врска со конфликтот, што, според него, се очекува „доста брзо“.

И покрај оптимистичниот тон, Трамп синоќа донесе одлука за продолжување на санкциите против Русија за уште една година. Американскиот државен секретар Марко Рубио, пак, претходно во април изјави дека Конгресот веќе работи на нов предлог-закон за дополнителни санкции – во случај Москва да продолжи со воените дејствија во Украина.

Интересен развој се случи минатиот петок во Санкт Петербург, каде што рускиот претседател Владимир Путин се сретна со специјалниот пратеник на американскиот претседател, Стивен Виткоф. Според Кремљ, средбата траела околу 4,5 часа и се одржала во Претседателската библиотека, каде што се дискутирало за можностите за постигнување мировен договор.

Од Белата куќа велат дека посетата на Виткоф претставува уште еден чекор кон прекин на огнот и стабилизирање на состојбата во регионот.

Меѓутоа, Ројтерс, повикувајќи се на неименувани американски официјални лица, пренесува дека Виткоф му пренел на Трамп дека „најбрзиот начин“ за прекин на огнот е признавање на руската контрола врз четирите новоокупирани украински региони.

Тоа не наишло на поддршка кај сите – специјалниот пратеник Кит Келог, кој исто така бил присутен на средбата, се спротивставил на оваа идеја. Според него, Украина нема да се откаже од териториите кои Русија ги зазеде, што ја прави ситуацијата далеку покомплицирана.

Во моментов, нема одлука за промена на американската стратегија, но очигледно е дека разговорите и натаму се водат – и тоа интензивно.

Трамп нареди директна воена интервенција на јужната граница со Мексико.

Американскиот претседател Доналд Трамп ѝ нареди на војската да преземе директни мерки долж јужната граница со Мексико, со цел да го запре нелегалниот премин на мигранти, повикувајќи се на загрозеноста на националната безбедност, пренесува Latin Times.

Според истиот извор, мерките веќе се применуваат во еден сектор на границата и вклучуваат изградба на физички бариери, поставување на опрема за надзор и распоредување на воени сили кои ќе ја контролираат границата.

Американската војска добила ново овластување да прогласи одредени делови од границата за зони од национално одбранбено значење, што им овозможува да ја прошират употребата на сила и да воспостават построга контрола на пристапот во тие области.

Како што пренесува Latin Times, со оваа одлука војската добива можност да дејствува според војни правила на ангажман, наместо според цивилни закони – што, според аналитичарите, отвора можност за потенцијални конфронтации со мигрантите.

Извршната наредба беше потпишана на 20 јануари, со која Трамп формално ја редефинира улогата на американската војска во заштитата на територијалниот интегритет на земјата. Како што самиот изјави, главната цел е „затворање на јужната граница и спречување на, како што рече, инвазија од нелегални мигранти.“