Македонија ќе биде 5-та земја во Европа според економскиот раст годинава – ова се очекувањата на премиерот Мицкоски за 2025-та. Тој оптимизмот го темели на најавените странски инвестиции, растот на извозот и потрошувачката, домашните вложувања. Последните податоци упатувале на тоа дека странските инвестиции го достигнале посакуваното ниво од една милијарда евра, а тој очекува овој износ да се надмине годинава.

„Најголемиот дел од тие инвестиции се во напредната технологија и чувствувам дека мораме да привлекуваме инвестиции коишто можеби не се толку поврзани со автомобилската индустрија така што една од овие инвестиции е напредна технологија, повеќе од 350 милиони евра е инвестицијата“ – вели Мицкоски.

Во моментов Владата преговара со 15 странски инвеститори кои се заинтересирани да го прошират својот бизнис во Македонија. Освен изградбата на ветерниот парк во општините Радовиш, Штип и Карбинци, има и компанија која сака да гради гасна централа. Мицкоски вели дека овие инвестиции треба да придонесат за намалување на загадувањето, но поради изградбата на топловодната мрежа, за тоа ќе се почека неколку години.

„Во периодот од ноември до март да го смениме системот на затоплување на домовите, односно помалку фосилно гориво, повеќе еколошки горива., меѓу кои и централното греење. За тоа да се случи потребнмо е да се изградат гасни централи. Ние работиме. Еден од инвеститорите, од овие 15, е таков што е заинтересиран да изгради такви гасни централи, но за тоа ќе треба време, најмалку две до три години за да сето тоа профункционира. За да се изградат топловоди може и повеќе, 5 до 6 години“ – вели Мицкоски.

Владата само во втората половина од минатата година донесе 8 странски инвеститори во земјава, кои треба да вработат 2.800 луѓе. Освен изградбата на ветерници на „Алказар енерџи“, инвестицијата на „Епсотех“ е за изградба на истражувачки центар во вредност од 20 милиони евра и нови 110 вработувања. Американскиот Вабтек кој веќе е присутен во земјава ќе произведува сопирачки за шински возила. Германската компанија „BMZ Group“ ќе произведува батерии во капацитет кој чини 65 милиони евра. Се потпишаа и два договори за инвестициите на „Брејнчајд“. Германската „Костал“ отвора нов погон од 50 милиони евра и нови 250 вработувања. „АД БАУ Интернационал“ ќе вложи 7 милиони евра. Во зоната во Кичево пак фирмата „Avesta“ ќе вложи 40 милиони евра и ќе вработи 600 луѓе.

Вицепремиерот и министер за транспорт Александар Николоски, во вечерашното гостување во Дневникот на ТВ Сител истакна дека претстои силен развој во авиосообраќајот и во следниот период најави нови дестинации за граѓаните.

Тој потенцираше дека шест дестинации се веќе потврдени, од Скопје директно во наредниот период ќе се лета за Барселона, Дубаи, Лион и Штутгарт, додека пак од охридскиот аеродром директно ќе се лета за Базел и до Истанбул на новиот главен аеродром, за што веќе се продаваат авионски карти од Сиднеј, Вашингтон и од Торонто за Охрид.

Покрај овие шест, Николоски вечерва најави уште четири нови авионски линии од македонските аеродроми.

„Ќе се лета од Скопје за Амстердам, од Скопје за Париз, и тоа до најблискиот аеродром до центарот – аеродромот “Орли”, имаме најава од “Катар Ерлајнс” дека ќе отворат најмалку една дестинација и многу интензивно работиме Скопје да стане само третиот главен град на Балканот од каде што ќе има прекуокеански летови. Во моментов прекуокеански летови има од аеродромот од Истанбул и аеродромот во Белград, а нашата цел е Скопје да биде третиот град од каде што ќе се лета прекуокеански”, истакна министерот Николоски.

Тој исто така најави и целосна реконструкција на терминалната зграда на охридскиот аеродром што ќе се реализира во следните неколку месеци, објект кој не е реконструиран откако е изграден.

„Најважно е да продолжат напорите за враќање на изгубената доверба во системот. За подобар живот е потребен економски раст, а за тоа се потребни економска слобода, политичка стабилност и предвидливост на политиките.
Македонската економија во 2025 година ќе оствари подинамичен раст со стапка на БДП од околу 4 %. Оваа проекција се потпира врз три столба: 1. Инфраструктурни проекти како автопати, железница, енергетика; 2. Локални инфраструктурни проекти со поддршка од 250 милиони евра од Владата; и 3. Инвестиции на приватниот сектор со кредитни средства со каматна стапка од 1,95 %. Овие три компоненти, заедно со странските инвестиции, силно ќе го придвижат инвестицискиот циклус. Потрошувачката ќе биде поддржана преку одмерено зголемување на платите, на пензиите и на кредитите од банките. Завршувањето на војната во Украина позитивно ќе влијае врз македонскиот извоз во ЕУ. Подеднакво значајно е да се одржи стабилност на цените за реално подобрување на животниот стандард. Не смее да се повтори трката на платите и на цените, која се случуваше изминативе години. Инфлацијата ќе се одржува на 2 до 2,5 % со координиран напор на НБРМ и на Владата“.

Извор: ekonomijaibiznis.mk