Нема дискриминација во одлуката за разрешување на директор на Агенцијата за разузнавање Ерол Муслиу.

Уставниот суд утврди дека нема дискриминација во одлуката за разрешување на директор на Агенцијата за разузнавање Ерол Муслиу од 28 јуни 2024 година.

Судијката Ана Павловска Данева, на прес-конференција, појасни дека како Суд утврдиле дека нема дискриминираност по полова и политичка основа.

– Судот едногласно одлучи дека нема ниту полова, ниту политичка дискриминација во одлуката за негово разрешување од претседателката Гордана Силјановска Давкова, изјави Павловска Данева.

Во поглед на политичка дискриминација, Судот, како што посочи Павловска Данева, констатира дека директор на Агенцијата не бил, ниту смеел да биде член на политичка партија, исто како и претседателот кој ја донел одлуката за негово разрешување.

Во однос на половата дискриминација, Павловска Данева, појасни дека изјавите на претседателката Гордана Сиљановска Давкова во кампања дека жените треба да бидат повеќе застапени на највисоките функции, сама од себе не може да биде основа за дискриминација.

– Ние како Суд утврдивме дека тука нема дискриминација бидејќи самите изјави на Претседателката не претставуваат доказ дека некој е дискриминиран и дека заложбата за поголема застапеност на жените на високи функции е заложба на секој еден граѓанин, рече Павловска Данева.

Од наводите во барањето, подносителот наведува дека е дискриминиран по основ на пол и на политичка припадност, во врска со членот 9 од Уставот.

Во барањето е наведено дека оспорената Одлука не содржи никакво образложение од кое може да се утврди дека е разрешен поради нестручно и несовесно извршување на функцијата, како што официјално било наведено во Одлуката.

Подносителот наведува неколку медиумски објави со кои укажува дека Претседателот на Република Северна Македонија од моментот на стапувањето на функција до моментот на донесување на спорните одлуки, остварува информативни средби со други раководни лица, заобиколувајќи го него како раководител на Агенцијата за разузнавање.

Подносителот наведува дека политичката дискриминација е вршена меѓудругото и на начин што одредени лица од политичка партија најавуваат кадровски смени и ново раководство иако немаат надлежност за тоа.

Во врска со дискриминацијата по основ на пол, наведено е дека Претседателот на Републиката го разрешува поради фактот што е маж, а во едно интервју има изјавено дека треба да се внимава на застапеноста на жените на највисоките функции.

Првиот вицепремиер и министер за животна средина и просторно планирање, Изет Меџити, за време на својата официјална посета на Соединетите Американски Држави, оствари значајна средба со американскиот конгресмен Пит Сешнс од Републиканската партија.

Во рамки на средбата, Меџити и Сешнс разговараа за билатералните односи меѓу Северна Македонија и САД, при што беше нагласена потребата од понатамошно продлабочување и проширување на соработката во различни области.

„САД останува наш стратешки партнер и пријател. Поддршката што ја добиваме е од непроценливо значење за развојот и стабилноста на Северна Македонија. Нашите односи ќе продолжат да се интензивираат во интерес на граѓаните и двете земји“, истакна Меџити.

Тој, исто така, ја изрази својата благодарност кон Соединетите Американски Држави за континуираната поддршка и соработка, потенцирајќи дека пријателството меѓу двете земји останува цврсто и стабилно.

Оваа официјална посета е дел од пошироките напори на владата на Северна Македонија за јакнење на меѓународните односи и привлекување на дополнителна поддршка за реформските процеси во земјата.

Градоначалникот на општина Битола, Тони Коњановски, денес оствари средба со претставници на словенечката компанија „Фурлани“, која има долгогодишно искуство во изградба на гондоли во скијачките центри низ Балканот. На средбата присуствуваа и секретарот на општината Борче Димитровски, советници од Советот на општина Битола и раководителот на Одделението за економски развој, Венцо Шишкин.

Главна тема на разговор беше подготовката за изработка на физибилити студија за изградба на гондола на Пелистер – проект кој веќе е изгласан во Советот на општина Битола. Како што беше истакнато на средбата, општината планира до крајот на март да изработи проектна програма, по што ќе следува јавна набавка за изработка на студијата.

„Со овој чекор правиме сериозен исчекор кон реализација на гондолата на Пелистер, што ќе значи значителен развој за туризмот во Битола и поширокиот регион“, изјави Коњановски.

По склучувањето на договорот за изработка на студијата, се очекува таа да биде готова во рок од шест месеци. Студијата ќе опфати клучни аспекти како финансиската исплатливост на проектот, вкупната цена на изградбата, можните локации и трасата на гондолата.

По состанокот, делегацијата изврши теренска посета на Ски центарот Ниже Поле и скијачкиот центар Копанки, каде што се запознаа со постоечката инфраструктура и можностите за развој. Исто така, беше остварена средба со директорот на хотелот „Молика“, Горан Исков, кој ги запозна гостите со хотелските капацитети и потенцијалите за идни инвестиции.

Оваа посета на словенечките експерти е резултат на претходни контакти и соработки што битолската делегација ги оствари при посетата на општина Чаетина, ЈП „Голдгондол“ и Златибор во Србија.

Општина Битола продолжува со активностите за развој на Пелистер како туристичка атракција, а градоначалникот Коњановски нагласи дека овој проект ќе биде значаен чекор кон подобрување на туристичката понуда и економскиот развој на регионот.