Администрацијата на американскиот претседател Доналд Трамп побара од Киев да ѝ го препушти управувањето со стратешкиот гасовод кој преку Украина го пренесува рускиот гас кон Европската Унија, објави новинската агенција Ројтерс, повикувајќи се на неименувани извори запознаени со текот на преговорите.

Овој услов се наоѓа во најновиот нацрт-договор за експлоатација на минерални суровини, со кој Вашингтон врши притисок врз украинските власти. Според информациите, САД инсистираат нивната државна Меѓународна финансиска развојна корпорација да добие контрола врз гасоводот што го поврзува рускиот град Суджа со украинскиот град Ужгород, кој се наоѓа на границата со Словачка, на влезот во ЕУ.

Станува збор за клучна енергетска артерија, изградена во советско време, која сè уште се смета за значаен дел од енергетската инфраструктура на регионот.

Меѓутоа, протокот на гас низ гасоводот е стопиран од почетокот на годинава, бидејќи Киев одби да го продолжи договорот за транзит со руската компанија „Гаспром“. Претходно, и Русија и Украина остваруваа значителни приходи од транзитните такси – дури и за време на првите години од воениот конфликт.

Вчера во Вашингтон се одржаа нови преговори меѓу американски и украински претставници, при што се разгледуваше поширок договор со кој САД би добиле пристап и до украинските минерални богатства, особено ретките земни минерали. Преговорите, според изворите, се одвиваат во „многу антагонистичка“ атмосфера.

Според Ројтерс, причината за тоа се „максималистичките барања“ од страна на администрацијата на Трамп, кои се дел од новиот предлог-договор доставен до Киев минатиот месец. Украина, која го одби првиот предлог на состанокот во Белата куќа кон крајот на февруари, ангажираше американско-британска адвокатска канцеларија за поддршка при преговорите.

Новата верзија на договорот предвидува САД да добијат приоритетен пристап до украинските рудници, а Киев би бил обврзан да ги префрла сите приходи од експлоатацијата на природните ресурси во заеднички инвестициски фонд. Меѓутоа, документот не содржи никакви конкретни безбедносни гаранции за Украина – нешто што за власта на претседателот Володимир Зеленски претставува врвен приоритет.

Авионска несреќа во Њујорк – урнат „Мицубиши МУ-2Б“, има загинати.

Мал авион од моделот „Мицубиши МУ-2Б“ со шест патници се урна во калливо поле во близина на Копаке, Њујорк. Несреќата се случила вчера (сабота) околу 12:15 часот по локално време, додека леталото било на пат кон аеродромот во округот Колумбија, во Хадсон. Урнатиот авион е пронајден на околу 50 километри јужно од планираната дестинација.

Локалните власти потврдија дека има жртви, но точниот број сè уште не е објавен, бидејќи приоритет е да се известат семејствата. Поради локацијата и тешкиот пристап – кал предизвикана од последното топење на снегот – местото на несреќата е целосно обезбедено од службите за итни интервенции и воздухопловни истражители.

Сведоци изјавиле дека го виделе или слушнале авионот непосредно пред уривањето, и веднаш повикале помош. Брзата реакција предизвика координиран одговор на повеќе агенции, вклучително и Канцеларијата на шерифот на округот Колумбија.

Истражителите од Федералната управа за авијација и Националниот одбор за безбедност на транспортот веќе се на терен, каде ја документираат локацијата, ги анализираат остатоците од леталото и ги собираат сите релевантни информации – од временски услови до техничка документација на авионот.

Моделот „МУ-2Б“ веќе подолго време е предмет на дискусија во воздухопловните кругови поради прашања поврзани со безбедноста и сложеноста на управување. Поради тоа, се очекува и детална проверка на квалификациите и обуката на пилотот.

Иако причините за падот засега се непознати, истрагата ќе се фокусира на можните технички дефекти, условите за летање и евентуална човечка грешка.

Лукашенко: „Белорусија нема што да бара во ЕУ – иднината е во евроазиската соработка“.

Претседателот на Белорусија, Александар Лукашенко, денеска изјави дека неговата земја нема никаква перспектива во Европската унија и нагласи дека Белорусите се национално свесни луѓе кои длабоко ја сакаат својата татковина.

Во изјава дадена пред новинари, Лукашенко го коментираше процесот на пристапување на Украина во Европската унија, оценувајќи го како скапа и нереална авантура.

„Во овој процес се вклучени многу функционери, се вртат милиони долари, а шансите Украина некогаш да стане дел од ЕУ се минимални. Луѓето таму само ги трошат европските грантови, а ништо реално не се случува“, рече белорускиот лидер, пренесе државната агенција БЕЛТА.

Лукашенко ја оцени Европската унија како централизирана политичка и економска структура каде што земјите-членки го губат својот национален и економски идентитет.

„Погледнете ја Словачка, погледнете ја Унгарија – сфатија дека ја губат својата суштина. Прво го изгубија идентитетот, а потоа и економијата. Повеќе не можеа да произведуваат самостојно“, рече Лукашенко.

Говорејќи за Украина, Лукашенко го нарече украинскиот претседател Володимир Зеленски „добар човек, но не и доволно искусен“. Притоа му порача дека во ситуации каде што недостига разбирање, треба да се слушаат поискусните.

Тој потсети и на проблемите што Украина ги имаше со извозот на жито преку ЕУ, алудирајќи на ситуацијата кога земјите-членки, како Полска, не дозволија транспортот на украинско жито за извоз во Африка, каде што владееше недостиг.

„Затоа и велам – Украина нема што да бара во Европската унија. Пазарите одамна се поделени, и нивната вистинска шанса е тука, во нашиот регион“, нагласи Лукашенко.

Според него, Украина заедно со Белорусија, Русија и Казахстан имала солидна основа за развој преку евроазиска соработка, но целата идеја била напуштена по, како што вели, „наметнувањето на националистичка идеологија“, што според него довело до сегашниот конфликт.

„Ќе ja завршиме овaa војна – имаше премногу жртви. Но, ако во меѓувреме и економијата пропадне, Украина ќе исчезне. Затоа, пред да побегнете во ЕУ, размислете – дали навистина им требате, и ако да – во каква состојба? Ќе бидете земја без индустрија, без земјоделство, без она со што некогаш се гордеевте“, заклучи Лукашенко.