Управата за хидрометеоролошки работи (УХМР) денеска издаде предупредување за обилни врнежи низ поголем дел од Македонија. Целата територија е покриена со „жолто“ и „портокалово“ ниво на метео аларм, а најкритично се очекува да биде во централните и источните делови каде локално можат да се соберат над 30 литри дожд на метар квадратен. Врнежите ќе бидат проследени со ретки грмежи, додека на планините ќе се спушта снег.
Особено внимание се препорачува во Југоисточна Македонија, каде УХМР прогласи „жолто“ ниво на хидро аларм поради потенцијалната опасност од излевање на реките.
Во главниот град Скопје, денот ќе биде претежно облачен, со повремени врнежи од дожд и умерен југоисточен ветер. Температурите ќе се движат помеѓу 5 и 11 степени Целзиусови.
Според прогнозата за утре, времето ќе се смени: претпладне ќе биде променливо облачно, со повремен локален дожд во источните делови и слаб снег на планините. Попладне облачноста ќе се намали, а дневните температури ќе достигнат до 12 степени, со слаб до умерен северозападен ветер.
