Спорт

Лоши вести за Реал Мадрид по поразот од Барселона

Реал Мадрид во тешка позиција по Ел Класико – седум бода зад Барселона и голем број повредени играчи

Реал Мадрид не успеа да извојува позитивен резултат во големото дерби со Барселона во рамки на шпанската Ла Лига и сега заостанува седум бода зад својот најголем ривал, само три кола пред крајот на сезоната 2024/2025.

„Кралевите“ сè уште се во игра за титулата од математички аспект, но потребен им е максимален број победи во преостанатите натпревари, како и вистинско чудо – Барселона да ги загуби сите натпревари до крајот на првенството. И покрај тешката ситуација, избраниците на Карло Анчелоти најавуваат борба до последната минута.

Мисијата на Реал, сепак, е дополнително отежната поради големиот број повредени играчи. По натпреварот со Барселона, на листата на отсутни се приклучија и Винисиус Жуниор и Лукас Васкез.

Винисиус има повреда на левиот зглоб и неговата сезона е завршена. Лукас Васкез, пак, има мускулна повреда на левата нога и сигурно ќе ги пропушти дуелите со Мајорка и Севилја. Тој ќе се обиде да биде подготвен за последниот натпревар против Реал Сосиедад, каде што, според најавите, ќе се прости од навивачите и клубот, со оглед на тоа што му истекува договорот.

Покрај нив, веќе подолго време од тимот се отсутни и Антонио Рудигер, Дани Карвахал, Едер Милитао, Давид Алаба, Ферлан Менди и Едуардо Камавинга – што ја прави ситуацијата за Анчелоти уште покомплицирана.

Спорт

Лазаров ги откри ракометарите за Европското првенство во јануари

Селекторот на македонската машка ракометна репрезентација, Кирил Лазаров, го соопшти списокот на ракометари кои ќе се подготвуваат за настап на Европското првенство, што во јануари ќе се одржи во Данска, Шведска и Норвешка.

На списокот се 21 ракометар, меѓу кои Самоил Ристевски од Еурофарм Пелистер е единствениот дебитант, додека голманот Мартин Томовски, кој настапува за германскиот тим Битигхајм, е единствениот кој игра во странство.

Подготовките ќе започнат во понеделник во Скопје, а Македонија ќе се натпреварува во групата Б во данскиот град Хернинг против домаќинот Данска, како и против Португалија и Романија. Двете првопласирани репрезентации ќе обезбедат пласман во следната фаза.

Повикани ракометари:

Голмани: Мартин Томовски, Никола Митревски, Иван Галевски

Леви крила: Петар Атанасијевиќ, Иван Џонов

Десни крила: Ненад Костески, Никола Костески

Средни бекови: Марко Митев, Игор Ѓоргиев, Мартин Ивановски

Леви бекови: Филип Кузмановски, Павле Атанасијевиќ, Дамјан Митев

Десни бекови: Томислав Јагуриновски, Мартин Серафимов, Мартин Велковски

Пивоти: Жарко Пешевски, Марко Стојковиќ, Валентин Карасманакис, Самоил Ристевски, Михаил Аларов

Спорт

Хамилтон се фрли во инженерските води, завршува со Ферари

Покрај тоа што Формула 1 сезоната официјално заврши, Маранело не е толку мирно колку што изгледа на прв поглед. По разочарувачката 2025 година, сè почесто се отвора едно клучно прашање: во кој правец всушност се движи италијанскиот гигант Ферари? Во оваа дебата, својот глас го даде и поранешниот шеф на тимот, Маурицио Аривабене, кој со отворени и директни зборови ги откри некои од најконтроверзните моменти и одлуки во Ферари, фрлајќи ново светло врз иднината на тимот.

Аривабене се осврна на Луис Хамилтон, седумкратниот светски шампион, кој дојде во Ферари пред сезоната 2025 како голем проект за враќање на титулата во Маранело. Но, адаптацијата на Хамилтон се покажа далеку потешка од очекуваното. Возачот не се задржа само на воланот – тој активно се вклучи во сите аспекти на развојот на болидот.

Во текот на сезоната, Хамилтон јавно призна дека ги следи и влијае внатрешните процеси во тимот. Испрати обемни документи до раководството со детали за моторот, аеродинамиката, предната и задната страна на болидот, како и општите проблеми што ги чувствуваше на патеката. Одржа низа состаноци со клучни членови на тимот, вклучително и со Фред Васер и техничкиот оддел, со јасна цел – да го забрза напредокот на тимот.

Но Аривабене предупредува: токму тука лежи потенцијалниот проблем.

Поранешниот шеф на Ферари ја спореди оваа ситуација со периодот кога Себастијан Фетел возеше за тимот (2015-2020). Фетел, исто така, беше активен во техничките дискусии, пишуваше документи и ги споделуваше своите идеи. „Возачот може да дава вредни повратни информации од патеката, но кога почнува да глуми инженер, приказната е практично завршена“, предупреди Аривабене.

Според него, деталниот технички развој мора да остане во рацете на експертите во фабриката. Симулаторот и повратните информации од трките се клучни алатки, но вистинските, длабински технички решенија бараат професионална експертиза која не смее да се меша со возачките амбиции.

Спорт

Навивачите ќе бидат наградени: ФИФА воведува посебни билети за најверните

ФИФА воведе нова категорија билети за Светското првенство 2026, наменета исклучиво за најверните навивачи. Според најавата, околу 10% од вкупниот капацитет на стадионите ќе бидат префрлени од најевтината сегашна категорија („ниво на вредност“) во новата „ниво на влез“.

Билетите во оваа категорија ќе имаат фиксна цена од 60 долари за сите натпревари на сите национални селекции, без разлика на мечот или локацијата. Но, овие билети нема да бидат достапни за слободна продажба преку официјалната ФИФА платформа – наместо тоа, секоја национална асоцијација ќе ги додели на своите најлојални навивачи.

Седиштата за оваа специјална категорија ќе бидат сместени во горниот дел на трибините, што ќе овозможи посебна атмосфера за навивачите кои секогаш ја покажуваат својата верност на тимот.