Широк пожар го зафати Кокотско поле во Подгорица, каде што екипите на Службата за заштита и спасување успеале да спасат над 100 куќи од огнената стихија. Пожарот се заканувал да го зафати и земјоделскиот имот на компанијата „Плантажи“ во близина на Ќемовско поле.
Големи пожари беа активни и во Љајковиќи во Зета, каде што куќите исто така беа под сериозна закана. Огнот зафати и голема површина меѓу Тузи, Миљеш и Карабушко поле, каде пожарот сè уште е активен.
„Одбраната на станбените објекти е во тек, а на едно од жариштата изгоре и еден автомобил“, соопштија од Службата за заштита на Подгорица.
Драган Стојановиќ, претставник на службата, за телевизијата „Вијести“ изјави дека причината за пожарите најверојатно е човечки фактор. „Не може да се работи за ништо друго. На теренот имаше осум возила со 16 пожарникари, кои се менуваа поради повеќе истовремени пожари – во Ботун, Кокоти и Љајковиќи. Вкупно беа ангажирани околу 30 пожарникари со 15 возила, а добивме поддршка и од колеги од Бар. Пристигнаа и пожарникари од Никшиќ. Спасивме голем број куќи, пилана и дел од фабрика за столарија“, нагласи Стојановиќ.
Надлежните апелираат на претпазливост и повикуваат граѓаните да не предизвикуваат пожари, особено во услови на високи температури и суво време.
