Воената власт во Буркина Фасо донесе декрет со кој се распуштаат сите политички партии и се укинува правната рамка што го регулираше нивното функционирање. Со истата одлука, целокупниот имот и финансиски средства на партиите преминуваат во сопственост на државата.
Одлуката доаѓа во услови кога политичката активност во земјата веќе подолг период е суспендирана, а според владината новинска агенција, мерката е дел од пошироките промени што ги спроведува воената хунта по преземањето на власта со државен удар во 2022 година.
Министерот за територијална администрација, Емил Зербо, изјави дека партиите биле распуштени откако властите процениле дека „отстапиле од принципите според кои биле основани“. Тој нагласи дека владата смета оти големиот број политички партии довел до злоупотреби, продлабочување на поделбите меѓу граѓаните и нарушување на општествената кохезија.
Мерката беше одобрена на седница на Советот на министри во четврток, а Зербо најави дека во најкус можен рок ќе бидат предложени нови закони со кои ќе се регулира формирањето и работата на политичките партии, но под нови услови кои сè уште не се објавени.
Активисти и организации за човекови права предупредуваат дека ваквите потези дополнително ги поткопуваат граѓанските слободи и го елиминираат секој облик на политичка опозиција.
Буркина Фасо е една од неколкуте држави во Западна и Централна Африка кои во последните години се под воена власт. Од државниот удар во 2022 година, воените лидери спроведуваат длабоки институционални промени, вклучително и одложување на изборите кои требаше да означат враќање кон цивилно владеење.
