Градоначалникот на Општина Битола, Тони Коњановски, заедно со директорот на КЈП „Нискоградба“, Зоран Талевски, денеска изврши увид во тековните градежни активности за реконструкција на мешовитата канализациона мрежа на улицата „Панде Кајзеро“.
Проектот, кој се реализира со средства од првиот повик на Владата за капитални инвестиции во 2024 година, е вреден 3.249.089 денари.
Реконструкцијата опфаќа две независни канализациони линии – Крак 1 и Крак 2.
Кракот 1, во должина од 309,7 метри, започнува од улицата „Илинденска“ и се протега кон северозапад.
Кракот 2 е долг 50,8 метри и се движи од улицата „7-ми Јули“ кон исток.
Во рамките на реконструкцијата, старите бетонски цевки ќе бидат заменети со нови коругирани полиетиленски (ПЕ) цевки, класа SN 8, со внатрешен пречник од 300 мм.
По завршувањето на реконструкцијата на канализационата мрежа, ќе следува и втората фаза од проектот – изградба на нов коловоз во должина од 380 метри, за што се обезбедени дополнителни 5.385.770 денари, исто така преку повик од Владата.
Градоначалникот Коњановски нагласи дека општината останува посветена на подобрување на инфраструктурата, особено во делот на основните комунални услови за живот на граѓаните.
