На прес-конференција, Арбер Кадриу од ВЛЕН-Чаир го обвини Министерството за надворешни работи за сомнителни, незаконски и исклучително скапи набавки за време на мандатот на поранешниот министер Бујар Османи. Документите што ги обезбеди ВЛЕН покажуваат дека за организацијата на Министерскиот совет на ОБСЕ во Скопје, во декември 2023 година, МНР склучило договор за изнајмување возила во вредност од 56.640.000 денари за дводневна конференција.
Според Кадриу, во договорот не било предвидено постоење на контролнo тело кое би потврдило колку возила се користеле, каков тип на возила бил ангажиран и колку денови. Ова, како што истакна, создава сомнежи за злоупотреба и корупција. Цените за VIP, средни и 8+1 возила биле трипати повисоки од претходниот договор со истиот оператор за исти услуги.
ВЛЕН постави прашања до Османи за тоа кој ја потврдил бројката на возила, зошто цените биле толку високи и каде завршиле дополнителните 700.000 евра. Кадриу нагласи дека Државниот завод за ревизија веќе регистрирал сериозни неправилности и случаите се предадени на Јавното обвинителство, оценувајќи ја ситуацијата како системска корупција и злоупотреба на државни средства.
