Владата и Министерството за спорт секогаш ќе застанат зад вакви манифестации кои ја промовираат Македонија во најдобро светло, истакна министерот Борко Ристовски на денешната прес конференција на која беше најавено 21.издание на Виз ер Скопскиот маратон што ќе се одржи на 5 октомври, под генерално покровителство на Министерството за спорт.

-Драго ми е што оваа традиционална манифестација се сфати од државата многу посериозно, не само преку финансиската поддршка и покровителството, туку и со целата потребна огранизациска поддршка. Јас секогаш сум за тоа да се поддржуваат вакви манифестации, кои што промовираат спорт и што е поважно од самите спортски резултати, се промовираат вистински вредности, кои што треба да се втемелени во генот на нашите дечиња – рече Ристовски.

Министерот за спорт посочи дека Виз ер Скопски маратон е пример како спортот може да обедини и да испрати позитивна порака за нашата земја.

-Овој настан е гордост за сите граѓани и е симбол на здрав дух, енергија и спортски вредности. Владата и Министерството за спорт ќе продолжат да даваат силна поддршка на вакви манифестации, бидејќи тие ја промовираат Македонија во најдобро светло, го поттикнуваат туризмот, ја зголемуваат меѓународната видливост на државата, а воедно инспирираат илјадници млади луѓе да се занимаваат со спорт и да градат здрави навики – дополни Ристовски и упати порака дека овој реномиран спортски настан во иднина ќе има уште поголема поддршка од државата и од Град Скопје.

Претседателот на Сојуз на спортови – Скопје, Зоран Стојановиќ ја потенцираше поддршката и помошта од Министерството за спорт, на чело со министерот Ристовски.

-Сакам да искажам голема благодарност до Министерството за спорт и Министерот Ристовски, коини беа од огромна помош во решавањето на големи технички проблеми кои искрснаа. Поради тоа, сакам да го замолам да почне уште од сега да размислува за маратонот следната година, со цел да го направиме уште поуспешен – истакна Стојановиќ.

На прес конференцијата се обрати и Бен Нупнау, заменик на амбасадор на Делегацијата на Европската Унија, кој потенцираше дека маратонот е повеќе од спортски настан.

-Ни претставува голема чест што и оваа година ќе можеме да го поддржиме Скопскиот маратон. Нашата соработка започна уште во 2007 година, а од 2019 година даваме поддршка на традиционалниот штафетен маратон. Европската унија не само што дава институционална поддршка на Скопскиот маратон, туку имаме и тркачи од таканаречениот ЕУ тим, кои што ќе учествуваат на маратонот во недела. Виз ер Скопски маратон е мост што ги поврзува луѓето преку спортот и заедништвото. Тој ја носи европската порака за инклузија, еднаквост и солидарност. Чест ни е што ЕУ е дел од оваа приказна која инспирира и ги сплотува граѓаните – изјави Нупнау и ги повика граѓаните да има дадат поддршка на учесниците на маратонот.

Оваа година, Скопје ќе биде домаќин на рекорден број пријавени учесници – повеќе од 14.000 натпреварувачи од 58 земји ширум светот, што претставува историски рекорд за најголемиот спортски настан во државата. Најмасовна останува трката на 5 километри со околу 10.300 учесници, при што третпат по ред доминираат жени – нешто што претходно не било случај. 

Во рамките на ова издание ќе се одржи и Балканско и Национално првенство во маратон, што дополнително ги зголемува важноста и престижот на настанот

Директорот на Виз ер Скопски маратон, Кире Синадиновски изјави дека 21. издание е посебно поради рекордниот интерес и фактот што манифестацијата прераснува во еден од најголемите спортски настани во регионот. 

Јубилејниот 21. Виз ер Скопски маратон ветува уште едно незаборавно издание кое ќе ја претвори метрополата во вистински спортски центар, обединувајќи ги натпреварувачите, навивачите и граѓаните во единствена маратонска магија низ улиците на Скопје.